GUNNAR

Auglýsing
Auglýsing
Frá degi til dags

Sannspár

Sá sem skrifaði þennan dálk í Fréttablað mánudagsins stakk upp á því að Jón Gnarr myndi „fara að nýlegu dæmi Banksys og skella myndinni í pappírstætarann“. Orðin voru skrifuð í samhengi við stóra Banksy-málið sem hefur tröllriðið reykvískri stjórnmálaumræðu undanfarna daga og snýst um verðmæti verks eftir Banksy sem Jón Gnarr fékk að gjöf gegn því að það myndi hanga á skrifstofu borgarstjóra. Jón hefur síðan sagt að myndin sé ódýr eftirprentun og í gær tilkynnti hann að hann hefði, í samráði við eiginkonu sína, ákveðið að farga verkinu. Ekki er hægt að fullyrða að þessi hugmynd hafi kviknað við lestur á Fréttablaðinu.

Núll turna stjórnmál

Víða í hinum vestræna heimi eru tveir turnar allsráðandi í stjórnmálunum. Þetta sést best í Bandaríkjunum en hefur einnig verið reglan lengi í Bretlandi svo fáein dæmi séu nefnd. Allt önnur mynd birtist í könnun sem MMR birti í gær um fylgi íslenskra flokka ef kosið yrði til þings í dag. Miðað við þá könnun má eiginlega tala um að hér sé enginn turn. Meira að segja Sjálfstæðisflokkurinn, sem hefur lengi getað talist mikill turn, mælist ekki með nema nítján prósent.

Auglýsing
Auglýsing
Bakþankar

Núll

Nú skrifa ég pistil sem meiðir ekki, særir ekki nokkurn mann (hefði ég átt að skrifa, manneskju? – er ég strax kominn í vandræði?). Öll málefni sem varða nokkru verða því látin lönd og leið í þetta sinn (eða, er ég þá um leið að útiloka vissa jaðarhópa? Er þetta að klikka hjá mér?). Gott og vel (ég tek bara svona til orða, „gott og vel“ ég geri mér grein fyrir því að það hafa það ekki allir jafn gott og fólki líður misvel).

Pistlar sem þessir eiga ekki að vera ögrandi. Þeir eiga ekki að vekja til umhugsunar og alls ekki hrista upp í neinum (hér er ég ekki að tala um bókstaflega hristingu, ekki um líkamlegt ofbeldi – íslenska tungumálið hefur bara þennan möguleika að tala um „að hrista upp í“, þetta er óskylt því sem átt er við með t.d. „shaken baby syndrome“ sem svo er kallað á útlensku – það er ofbeldi sem ber að fordæma). „Bakþankar“ heita einmitt svo því þar eiga að birtast þankar sem eiga heima bakatil, og fólk á því ekki að leiða hugann að (ég tek fram að þegar ég segi að þankar „eigi heima bakatil“ er ég ekki með neinum hætti að niðra rassa og alls ekki að veitast að þeim sem hafa þá líkamshluta í hávegum (kannski var þetta heldur ekki passandi?)).

Þegar ég ákvað að kalla þennan pistil Núll vissi ég að ég gæti átt það á hættu að einhver sæi út úr því orði tölustafinn núll, og því um leið farið að túlka það gat með klámfengnum hætti, en ég verð bara að viðurkenna þá dirfsku að ég tók áhættuna og lét slag standa (með standa er ég ekki að vísa til …).

Það er vandlifað – og skrifað.

Auglýsing
Auglýsing