HALLDÓR

Auglýsing
Auglýsing
Frá degi til dags

Allt bókað

Sagt var frá því í Fréttablaði gærdagsins að Metoo-ráðstefnu Alþingis, sem fara átti fram sama dag og þingsetning í næstu viku, var frestað að beiðni Miðflokksins. Ástæðan var sú að tímasetningin hentaði illa og var fundinum því frestað. Það má velta því fyrir sér hvort í þessu máli séu einfaldlega ekki allar tímasetningar slæmar fyrir flokkinn. Óráðshjal flokksmanna fyrir um mánuði er flestum í fersku minni og mest þeim sjálfum. Mögulega þurfa flokksmenn að hjóla í helvítis sjálfið áður en þeir geta mætt öðrum á slíkum vettvangi. 

Brölt Miðflokksins 

Annars er Miðflokkurinn að sjálfsögðu ekki á flæðiskeri staddur með annálaða jafnréttisriddara. Gunnar Bragi Sveinsson var rómaður á alþjóðavettvangi fyrir HeForShe-átakið og þá er Anna Kolbrún Árnadóttir formaður stjórnar Jafnréttissjóðs Íslands. Framganga þeirra á Klaustri þýðir að fákur þeirra er eilítið haltari en hann var en það er aldrei að vita nema flokkurinn taki á stökk á ný. Nái flokksmenn að temja hrossið svo vel ætti að verðlauna þá í flokknum fyrir mestu framfarir þegar téð ráðstefna hefur runnið sitt skeið.

Auglýsing
Auglýsing
Bakþankar

Bogalaga toppur ísjakans

Hvort sem fólki líkar betur eða verr þá er Braggamálinu hvergi nærri lokið. Nýlegt útspil var tillaga um að vísa málinu til héraðssaksóknara. Þótt niðurstaða innri endurskoðunar borgarinnar hafi verið að fjölmargar brotalamir hafi verið í stjórnsýslu borgarinnar er það ekki niðurstaðan að refsiverð háttsemi hafi átt sér stað. Tillagan er því sett fram til að slá pólitískar keilur og er því engum til sóma sem að henni kemur.

Karp um þetta dregur athygli frá hinum stóra lærdómi sem ætti að draga af málinu um agaleysi í opinberum rekstri. Of fáir stjórnmálamenn leggja áherslu á ráðdeild í opinberum rekstri í störfum sínum. Í stað þess leggja þau áherslu á að gera sem mest sem kostar peninga. Þau virðast ekki átta sig á því að þetta eru tvær hliðar á sama peningnum. Því meiri sem aginn er í útgjöldum því meira svigrúm er til að setja fé í eitthvað sem raunverulega skiptir máli.

Fyrstu mistök borgarinnar voru að ætla sér að gera upp hús til að leigja út. Það var frá upphafi augljóst að betra væri að slík áhættustarfsemi væri í höndum einkaaðila. Fyrir þær 425 milljónir sem fóru í þetta væri hægt að fjármagna 234 pláss í grunnskóla eða veita 176 fátækum fjárhags­aðstoð í eitt ár. Bragginn er aðeins bogalaga toppur á þeim ísjaka sem agaleysi í opinberum rekstri og framkvæmdum er. Það er löngu orðið tímabært að stjórnmála- og embættismenn geri sér grein fyrir ábyrgð sinni og taki þessi mál föstum tökum.

Auglýsing
Auglýsing