Úkraínskir ljósmyndarar vilja sýna fegurð lands síns fyrir hörmungar stríðsins í nýrri sýningu í Norræna húsinu.

Ljósmyndasýningin Heima verður opnuð í Norræna húsinu á morgun. Þar verður að finna myndir teknar af sex úkraínskum ljósmyndurum áður en stríðið hófst. Sýningarstjórar eru Yegveny Dyer og Iryna Kamienieva, sem búa bæði á Íslandi.

„Ég kom til Íslands í byrjun mars á þessu ári til að sækja um alþjóðlega vernd,“ segir Iryna. „Mér fannst ég frekar týnd fyrst um sinn og vildi endilega taka þátt í stuðningi við Úkraínu svo ég skipulagði úkraínska ljósmyndasýningu í Núllinu Gallerý. Þar kynntist ég Yevgeny sem kom að sjá sýninguna.“

Yevgeny hefur búið á Íslandi síðastliðin 11 ár og segir ljósmyndun hafa verið helstu ástríðu sína á þeim tíma.

„Fyrsta verkefnið mitt var tileinkað innflytjendamálum, nánar tiltekið hvernig það er að vera fjarri heimili sínu og missa það síðan án þess að finna nýtt,“ segir hann.

Þau Irina og Yevgeny sáu listina sem kjörið verkfæri til að fá fólk til að missa ekki áhugann á Úkraínu og spratt sýningin út frá því.

„Við vildum sýna Úkraínu á jákvæðari hátt en fólk hefur vanist á síðustu mánuðum,“ segir Yevgeny. „Við viljum að fólk upplifi hlýju, notalegheit og fjölbreytileika landsins, upplifi þær tilfinningar sem við ólumst upp við.“

Að fanga hlýjuna

Á myndum sínum á sýningunni reynir Yevgeny að sýna Úkraínu eins og hann upplifði landið fyrir stríð – litríkt og andrúmsloftið létt.

„Að vera innflytjandi aðskildi mig frá Úkraínu á vissan hátt og sem ljósmyndari vildi ég að ég hefði fangað meira af hlýju lands míns. Þrátt fyrir það þykir mér enn vænt um hverja stund og hverja mynd sem ég hef tekið þar,“ segir hann.

Iryna tekur undir með Yevgeny.

„Við sjáum margar úkraínskar sýningar í ólíkum löndum, allar um stríðið. Okkar snýst líka um stríðið en í fyrsta lagi erum við að leggja áherslu á að þetta stríð sé að gerast á fallegum stað sem við köllum heimili okkar,“ útskýrir hún. „Margir útlendingar höfðu ekki heyrt um Úkraínu fyrir stríðið og það gæti verið erfitt fyrir þá að ímynda sér hvernig landið var áður. Við viljum gefa þeim tækifæri til þess.“

Sýningin verður opnuð klukkan 17 á morgun og stendur yfir til 20. ágúst. ■

Myndin af þessum appelsínugula bíl er Yevgeny sérstaklega kær. Afi hans átti bílinn í meira en tuttugu ár og tréð þar á bak við var gróðursett daginn sem Yevgeny fæddist. Mynd/Yevgeny Dyer
Þessa mynd tók Iryna á eyjunni Dzharylhach árið 2020. Vinahópurinn hennar var samankominn til að fagna afmæli eins vinarins og á myndinni má sjá sólarupprisuna morguninn eftir veisluna.
Alls koma sex ljósmyndarar að sýningunni.