Yfir 80 prósent af tölvuárásum byrja með svikatölvupósti. Tapið hjá almennum borgurum árlega vegna svikapósta hleypur á hundruðum milljóna. Töluvert magn svikatölvupósta í nafni Póstsins og annarra þekktra vörumerkja berst Íslendingum árið um kring en jafnan er meira um slíka pósta fyrir hátíðarnar því þá eigi fleiri von á sendingum. Þetta kemur fram í tilkynningu.

„Það sem hefur verið mest áberandi undanfarnar vikur eru tölvupóstar sem líta út fyrir að koma frá Póstinum þar sem viðtakendur eru beðnir um að smella á hlekk til þess að ganga frá greiðslu vegna sendingar,“ segir Guðjón Ingi Ágústsson, forstöðumaður stafrænna lausna og upplýsingatækni hjá Póstinum. „Sé smellt á hlekkinn kemur upp síða þar sem viðtakandi er beðinn um að fylla inn persónuupplýsingar og kortaupplýsingar. Það sem gerir þessa tölvupósta sérlega varhugaverða og erfiða viðureignar er að þeir eru oft mjög sannfærandi og skrifaðir á nokkuð vandaðri íslensku. Það er því skiljanlegt að fólk falli fyrir þeim en það getur haft töluvert fjártjón í för með sér. Það er því mjög mikilvægt að hafa í huga að Pósturinn biður ekki um kortanúmer í gegnum tölvupóst heldur fara allar greiðslur í gegnum Mínar síður á posturinn.is eða í póst-appinu. Ekki ýta á hlekki og alls ekki gefa upp persónuupplýsingar eða kortaupplýsingar nema að vel athuguðu máli,“ segir hann.

Pósturinn og netöryggisfyrirtækið AwareGO hafa sameinað krafta sína í baráttunni við svikapósta. Meðal þess sem fram kemur í forvarnarmyndbandi frá fyrirtækjunum eru góð ráð til að forðast svikapósta: að athuga vel netfang sendanda, skoða vel netslóð á bak við hlekkinn og vera vakandi fyrir lélegri málnotkun, stafsetningarvillum og hótunum, t.d. um að pakkinn verði sendur til baka. Fyrirtækin tvö hafa gefið út sérstakt jólamyndband til að fræða fólk um svikapósta.

„Tölvuglæpir fara vaxandi og geta valdið miklum skaða fyrir fyrirtæki og einstaklinga. Langstærstur hluti þessara glæpa byggir á því að plata fólk, t.d. með svikapóstum og fölskum vefsíðum. Markmið AwareGO er að lágmarka áhættuna á því að fólk falli fyrir svikum og fölsunum glæpamanna, meðal annars með útgáfu myndbanda sem fá fólk til að bregðast rétt við. Jólin eru sérstakur áhættutími og því höfum við gefið út sérstök jólamyndbönd síðustu tvö árin. Þetta árið gerum við það í góðu samstarfi við Póstinn og er það sannarlega ánægjulegt að vinna þetta með þeim,” segir Ari Kristinn Jónsson, forstjóri AwareGO.