Enn einu sinni er nú tvísýnt um framtíð WOW ef marka má fréttaflutning. Breskir miðlar greindu frá því í vikunni að komin væri upp mikil óvissa í viðræðum Skúla Mogensen og fjárfestingasjóðsins Indigo, en ásteytingarsteinninn væri sá hversu stórum hlut Skúli skyldi halda að fjárfestingunni lokinni. Aðilar ákváðu þó að halda lífinu enn sem komið er í viðræðunum og hafa nú gefið sér frest til næstu mánaðamóta.

Atburðarásin sem fór af stað í kjölfarið er öllum kunnugleg sem fylgst hafa með málinu. Titringur á markaði, orðrómur um að Skúli hafi tekið upp tólið til Icelandair, og loks myndarleg hækkun á bréfum í Icelandair. Því til viðbótar má bæta við ýmsum merkjum um lausafjárkrísu hjá WOW, allt frá skyndiútsölum á fargjöldum og varningi um borð í vélunum, og nú nýlegast staðfestingu á því að félagið hafi ekki greitt mótframlag starfsmanna sinna undanfarna þrjá mánuði. Allt bendir þetta til þess að félagið rói nú lífróður.

Þessi vetur sem senn breytist í vor hefur umfram allt einkennst af óvissu á mörkuðum. Ótvírætt er að fjarað hefur undan þeim mikla uppgangi sem hér hefur ríkt undanfarin ár. Þess sjást merki um allt atvinnulífið. Að flestu leyti er þar um að ræða eðlilegar sveiflur í hagkerfinu. Þá hafa tveir einstakir þættir haldið atvinnulífinu í spennitreyju. Vinnumarkaðsdeilur og framtíð WOW air. Fall WOW hefur sennilega verið metið inn í eignaverð nokkrum sinnum á liðnum misserum. Einhvern tíma hlýtur botninum að vera náð.

Eins og allir þekkja er öll óvissa slæm á fjármálamörkuðum. Auðvitað hefðu margir getað haldið betur á spöðunum í yfirstandandi kjaraviðræðum. Tímasetning þeirra nú þegar hagsveiflan nálgast botninn er sömuleiðis óheppileg. Kjarabarátta er hins vegar nokkuð þekkt stærð á mörkuðum og nokkuð sem viðbúið er að komi upp með nokkurra ára millibili.

Svo er hins vegar ekki með framtíð WOW air sem eftir allt saman er tiltölulega lítið alþjóðlegt flugfélag. Það er ekkert eðlilegt við að fjárfestar og fólkið í landinu bíði mánuðum saman með öndina í hálsinum eftir því hvort Skúla Mogensen takist hið ómögulega Nú hlýtur að mega slá botn í þetta. Óvissan er af öllu verst, en ef illa fer er að minnsta kosti hægt að takast á við verkefnið.