Endanlegt samkomulag hefur náðst á milli USAerospace Associates, félags bandarísku athafnakonunnar Michele Ballarin og skiptastjóra þrotabús WOW air um kaup félagsins á þeim eignum þrotabúsins sem tilheyra WOW vörumerkinu. WOW air mun hefja lággjaldaflugrekstur til Bandaríkjanna og Evrópu og er fyrsta flugið áformað milli Washington Dulles og Keflavíkur í október.

Þetta kom fram á nýloknum blaðamannafundi sem Ballarin, einnig þekkt sem Michele Roosevelt Edwards, stóð fyrir á Grillinu á Hótel Sögu. Áætlanir gera ráð fyrir vaxandi umsvifum þegar líður á veturinn og mæta síðan árstíðabundinni aukningu í farþegaflugi til og frá Íslandi næsta sumar. Stjórnendateymi félagsins mun leggja mikla áherslu á vöruflutninga í starfseminni.

USAeropsace er bandarískt eignarhaldsfélag sem sérhæfir sig í fluggeiranum. Stærsti hluthafinn og stjórnarformaður er Michele Ballarin sem en hún verður einnig stjórnarformaður WOW air LLC. Félagið verður staðsett Washington Dulles með aðstöðu á Keflavíkurflugvelli og skrifstofu í Reykjavík.

„Endurvakinn flugrekstur WOW air skiptir almenning á Íslandi og sömuleiðis í Bandaríkjunum miklu máli og mun efla bæði menningarleg og viðskiptaleg tengsl milli á milli Reykjavíkur og Washington. Við hyggjumst auka umsvifin í farþegafluginu með fleiri flugvélum áður en sumarið heilsar okkur. Frá fyrsta degi í vöruflutningum, sem einnig munu hefjast á næstu vikum, munum við leggja mikinn metnað í vandaða þjónustu á sviði vöruflutninga með ferskt íslenskt sjávarfang á Bandaríkjamarkað,“ segir Ballarin.