Innlent

WOW air tapaði 2,4 milljörðum í fyrra

WOW air tapaði 22 milljónum dala, sem jafngildir tæplega 2,4 milljörðum króna, á síðasta ári. Skúli Mogensen, forstjóri og stofnandi WOW air, segir „marga áhugaverða möguleika“ til skoðunar varðandi langtímafjármögnun flugfélagsins.

Skúli Mogensen, forstjóri og stofnandi WOW air. Fréttablaðið/Anton Brink

WOW air tapaði 22 milljónum dala, sem jafngildir tæplega 2,4 milljörðum króna, á síðasta ári. Til samanburðar skilaði flugfélagið hagnaði upp á 35,5 milljónir dala eða jafnvirði 3,8 milljarða króna árið 2016.

Skúli Mogensen, forstjóri og stofnandi WOW air, segir afkomuna fyrir síðasta ár vonbrigði þar sem vöxtur og fjárfestingar flugfélagsins hafi reynst dýrari en gert hafði verið ráð fyrir. Hann segir stjórnendur félagsins vera að skoða „marga áhugaverða möguleika varðandi langtímafjármögnun“ flugfélagsins.

Tekjur WOW air námu 486 milljónum dala, sem jafngildir 52 milljörðum króna, á síðasta ári sem er 58 prósenta aukning miðað við árið á undan. Rekstrarhagnaður fyrir afskriftir, fjármagnsgjöld og tekjuskatt (EBITDA) var 4 milljónir dala, 320 milljónir króna, samanborið við 46 milljónir dala eða 4,9 milljarða króna árið 2016. Lækkaði EBITDA þannig um 91 prósent á árinu. Rekstrartap (EBIT) flugfélagsins var 13,5 milljónir dala árið 2017 en félagið skilaði rekstrarhagnaði upp á 30 milljónir dala árið 2016.

Eiginfjárhlutfall félagsins var 10,9 prósent í lok síðasta árs. Framboðnum sætiskílómetrum fjölgaði um 80 prósent á árinu og farþegum um 69 prósent.

Ytri aðstæður krefjandi

Í tilkynningu frá WOW air segir að frá stofnun flugfélagsins árið 2011 hafi félagið vaxið mjög hratt. Fjárfest hafi verið í nýjum flugvélum, nýjum áfangastöðum og þá sérstaklega í uppbyggingu innviða eins og tækniinnviðum og öflugu starfsfólki. Umræddar fjárfestingar séu allar liður í því að tryggja langtímahorfur félagsins.

Eiginfjárhlutfall WOW air var 10,9 prósent í lok síðasta árs. Fréttablaðið/Vilhelm

Afkoma síðasta árs einkenndist af auknum kostnaði vegna þessa vaxtar og fjárfestinga, að því er segir í tilkynningunni, en á síðustu misserum hefur verið unnið í því að styrkja grunnstoðir félagsins.

Í tilkynningunni er haft eftir Skúla að ytri aðstæður hafi reynst félaginu krefjandi, svo sem hækkandi olíuverð, styrking krónunnar, dýrt rekstrarumhverfi á Íslandi og mikil samkeppni á lykilmörkuðum félagsins.  

„Árið 2018 einkennist áfram af mikilli uppbyggingu og erum við mjög ánægð með þá markaðshlutdeild sem félagið hefur náð til og frá Íslandi og yfir Atlantshafið á mjög skömmum tíma. Þetta er öflugur grunnur til að byggja ofan á um ókomna tíð og til að styrkja stoðir félagsins enn frekar,“ segir Skúli.

Horfur fyrir þetta ár sagðar ágætar

Horfur fyrir árið 2018 eru ágætar, eftir því sem fram kemur í tilkynningu WOW air, en þar segir að félagið standi þó vissulega frammi fyrir sömu áskorunum og önnur flugfélög með háu olíuverði og óvissu með gengi íslensku krónunnar. 

Framboð floginna sætiskílómetra var 29 prósent meira fyrstu sex mánuði ársins í samanburði við sömu mánuði árið 2017. Farþegum félagsins fjölgaði um 31 prósent miðað við sama tíma í fyrra og er mest aukning í tengifarþegum sem ferðast yfir Atlantshafið og eru þeir nú um 55 prósent af farþegum félagsins. 

Á fyrstu sex mánuðum ársins var 37 prósenta vöxtur í tekjum WOW air og einingatekjur (RASK) félagins hækkuðu á sama tíma um 5 prósent. Sætanýting það sem af er ári hefur verið 91 prósent.

Tekjur flugfélagsins jukust um 37 prósent á fyrstu sex mánuðum ársins. Ljósmynd/WOW air

60 prósenta vöxtur í fraktflutningum

Í afkomutilkynningunni segir jafnframt að góður vöxtur hafi verið í tekjum félagsins í fraktflutningum en WOW air eignaðist 60 prósenta hlut í Cargo Express á fyrra hluta þessa árs. Á fyrstu sex mánuðum ársins var 60 prósenta vöxtur í tekjum af fraktflutningum. Cargo Express velti 1,4 milljarði króna í fyrra og skilaði 235 milljónum króna í hagnað eftir skatta.   

WOW air er á árinu búið að taka á móti þremur nýjum Airbus A321 flugvélum og fjórar Airbus A330neo flugvélar munu bætast við flotann í lok árs og verður þá floti félagsins 24 vélar. Það sem af er ári hafa bæst við sjö nýir flugvellir; í Detroit, Dallas, St Louis, Cleveland, Cincinnati, New York JFK og London Stansted. Áfangastaðir WOW air eru því um 40 talsins árið 2018. 

WOW air mun hefja flug til Indlands 6. desember og hefur sala flugsæta gengið vel, að því er segir í tilkynningunni, en mikill áhugi er sagður vera á þessari flugleið frá Bandaríkjunum, Kanada og Indlandi.

Athugasemdir

Auglýsing
Auglýsing

Tengdar fréttir

Innlent

Eik tapaði dómsmáli gegn Andra Má

Innlent

WOW air klárar 60 milljóna evra fjármögnun

Sjávarúvegur

FISK-Sea­food kaupir þriðjung í Vinnslustöðinni

Auglýsing

Nýjast

Bláa lónið í hóp stærstu hluthafa í Icelandair

Safnaði 7,7 milljörðum

Varða Capital tapaði 267 milljónum í fyrra

Mögulega sekur um „alvarleg brot“ á samkeppnislögum

Engar olíulækkanir í spákortunum

Stytting vinnu­tíma mikil­vægasta kjara­málið

Auglýsing