Innlent

Vörumerkið geti náð fótfestu um allan heim

Framkvæmdastjóri Icelandic Trademark Holding segir mikil sóknarfæri fyrir framleiðendur í að nýta sér Icelandic-vörumerkið til að sækja á erlenda markaði. Vel fari á því að þjóðin eignist vörumerkið.

„Vörumerkið gæti svo vel náð til fleiri vöruflokka en aðeins sjávarafurða,“ segir Sara Lind Þrúðardóttir, framkvæmdastjóri Icelandic Trademark Holding. Vörumerkið var í gær afhent ríkinu til ævarandi eignar. Fréttablaðið/Sigtryggur Ari

Sara Lind Þrúðardóttir, framkvæmdastjóri Icelandic Trademark Holding, félags sem heldur utan um rekstur vörumerkjanna „Icelandic“ og „Icelandic Seafood“, segir vel fara á því að íslenska þjóðin eignist vörumerki sem vísi eins sterkt í uppruna sinn og umrædd vörumerki gera. „Íslensk fyrirtæki munu þannig geta tengt sig við uppruna sinn og þar með styrkt efnahagslegar undirstöður samfélagsins til lengri tíma litið,“ segir hún í samtali við Markaðinn.

Hún telur Icelandic-vörumerkið, sem var í gær afhent ríkinu til ævarandi eignar, vel geta náð fótfestu á fleiri mörkuðum.

„Mér finnst þetta merki geta – í óumdeildu eignarhaldi – ferðast um allan heim. Það felast í því mikil sóknarfæri fyrir íslenska framleiðendur að nýta sér merkið til þess að sækja á erlenda markaði. Áhugi umheimsins á Íslandi hefur aukist gríðarlega á síðustu árum og eins gera neytendur sífellt meiri kröfur til rekjanleika matvara og eru tilbúnir að greiða hærra verð fyrir hágæðavörur. Tækifærin eru því sannarlega fyrir hendi.“

Icelandic Trademark Holding, sem hefur verið í eigu Framtakssjóðs Íslands, var stofnað til þess að halda utan um markaðssetningu vörumerkisins ásamt þjónustu við leyfishafa.

„Ég fékk það verkefni á mitt borð fyrir rúmum tveimur árum,“ segir Sara Lind, „að skoða möguleika vörumerkisins og hvernig hægt væri að auka virði þess enn frekar til framtíðar. Við fórum í mikla vinnu með erlendum og innlendum ráðgjöfum, ferðuðumst um heiminn, hittum þá sem hafa unnið með merkið og fleiri og leituðum meðal annars svara við því hvað vörumerkið stæði fyrir.

Rauði þráðurinn í þeim svörum var að merkið stæði fyrir hreinleika, sjálfbærni, náttúru og gæði. Við ákváðum því að til framtíðar myndu aðeins hágæða íslenskar afurðir verða seldar undir vörumerki Icelandic.“

Sara Lind segir að hingað til hafi vörumerkið einkum verið notað fyrir sjávarafurðir. Vinna síðustu missera hafi hins vegar leitt í ljós að mikil tækifæri geti falist í því að útvíkka notkun merkisins þannig að það nái yfir fleiri íslenskar afurðir, til dæmis lýsi, skyr, ost og aðrar landbúnaðarafurðir, svo aðeins nokkur dæmi séu nefnd. „Vörumerkið gæti svo vel náð til fleiri vöruflokka en aðeins sjávarafurða,“ segir hún.

Sara Lind bendir á að margir íslenskir framleiðendur sinni framleiðslu sinni af kostgæfni og séu færir í sínu fagi en það sé þeim hins vegar kostnaðarsamt að þróa sjálfir vörumerki og búa til markaðsefni og auglýsingar fyrir vörurnar sínar.

„Þar komum við til sögunnar. Við getum hjálpað framleiðendum við að kynna og markaðssetja vörur sínar undir vörumerki Icelandic á erlendum mörkuðum. Í stað þess að framleiðendur séu hver í sínu horni getum við byggt Icelandic upp sem eins konar vettvang fyrir þá, þar sem þeir fá stuðning til þess að koma afurðum sínum á framfæri á mörkuðum erlendis. Það er stóra hugmyndin. Svo er að vinna áfram með hana með nýjum eiganda.“

Félagið standi vörð um vörumerkið á þeim mörkuðum þar sem það er skráð. Inn í samstarfið geti þannig komið nýir framleiðendur og nýtt sér að selja vörur sínar undir vörumerkinu, auk þess að hafa aðgang að markaðs- og kynningarefni, mörkuðum og þjónustu af hálfu Icelandic Trademark Holding. Allt þetta lúti að því að auka hróður og verðmæti íslenskra afurða.

Samstarfið við Highliner eflt

Icelandic Trademark Holding er með nytjaleyfissamninga við Solo Seafood, eiganda Ibérica á Spáni, sem selur íslenskar sjávarafurðir undir vörumerkjum Icelandic í suðurhluta Evrópu, og Highliner Foods, stærsta sjávarútvegsfyrirtæki í Norður-Ameríku, sem er leyfishafi vörumerkingar fyrir frosnar sjávarafurðir. Samningurinn við síðarnefnda fyrirtækið rennur út á þessu ári.

„Stjórnendur Highliner Foods hafa mikinn áhuga á því að endurnýja samninginn við okkur og efla samstarfið til framtíðar, til dæmis með því að þróa nýjar vörur undir vörumerkinu og setja aukinn kraft í markaðs- og sölustarf. Í því geta falist mikil tækifæri fyrir íslenska framleiðendur.“

Sara Lind segir að viðræðurnar um endurnýjun samningsins séu á lokametrunum. Hún tekur fram að samkvæmt nýjum samningi verði einungis seldar vörur af íslenskum uppruna undir vörumerkinu.

Eisn og hið fullkomna hjónaband

Í febrúar skrifuðu Icelandic Trademark Holding og Margildi undir leyfissamning um markaðssetningu og sölu á fiskolíum undir vörumerkinu „Icelandic Fish Oil“ í Bandaríkjunum, en Margildi er íslenskt fyrirtæki sem hefur sérleyfisvarða aðferð við að framleiða hágæðalýsi til manneldis.

Sara Lind segir samninginn þann fyrsta sem Icelandic Trademark Holding hafi gert við fyrirtæki sem selji ekki sjávarafurðir. Fleiri framleiðendur hafi sýnt áhuga á viðlíka samstarfi.

„Samstarfið við Margildi er frábært dæmi um það hvernig við getum unnið saman með framleiðendum. Þeir eru með þeim bestu í heiminum í því sem þeir gera en þá vantaði hins vegar vörumerki og stuðning til þess að komast inn á Bandaríkjamarkað. Ég líki þessu stundum við hið fullkomna hjónaband. Við komum inn í sambúðina með vörumerkið, markaðsefni, auglýsingar og stuðning til þess að komast á erlenda markaði en þeir koma með olíurnar. Saman myndum við sterka einingu. Ég sé fram á að við getum gert það sama í samstarfi við fleiri íslenska framleiðendur. Margildi er fyrst en aðrir framleið- endur geta svo sannarlega fylgt í kjölfarið.“

Athugasemdir

Auglýsing
Auglýsing

Tengdar fréttir

Innlent

IFS spáir tekjuvexti hjá Símanum

Innlent

Ný byggð rís yst á Kársnesi

Fjarskipti

Sím­­inn fagn­­ar nið­ur­stöð­u Hæst­a­rétt­ar í máli gegn Sýn

Auglýsing

Nýjast

Að geta talað allan daginn hentar vel

Hjá Höllu opnar í flugstöðinni

Skotsilfur: Engin hagræðing

Einn kröfu­hafanna reyndist norður­kóreskur

Gengisstyrking og hækkanir í Kauphöllinni

48 fyrir­tæki og stofnanir í Fjár­tæknikla­sanum

Auglýsing