Kynningarfundur um atriði sem snúa að meðhöndlun á virðisaukaskatti við sölu á vörum eða þjónustu til ESB-landa og Bretlands verður haldinn 8. febrúar í húsi Grósku. Fundurinn verður haldinn af Deloitte Legal og Íslandsstofu.
Íslandsstofa leggur áherslu á að mikilvægt sé fyrir íslensk fyrirtæki að átta sig á hvaða reglur gilda um meðhöndlun á virðisaukaskatti áður en viðskipti á milli landa eiga sér stað. Mismunandi reglur gilda eftir því hvort selt er til fyrirtækis eða einstaklings, hvar varan er framleidd og afhent, hvort varan eða þjónustan er seld í vefsölu eða jafnvel afhent á rafrænu formi.
Í tilkynningu minnir Íslandsstofa einnig á nýjar reglur um vefsölu sem kynntar voru árið 2021. Söluupphæð getur jafnframt skipt máli varðandi hvaða reglur gilda og í sumum tilvikum myndast endurgreiðsluréttur.
Deloitte Legal hefur í samstarfi við Íslandsstofu tekið saman ýmis dæmi sem íslensk fyrirtæki standa frammi fyrir við sölu vöru og þjónustu til Evrópusambandslanda og Bretlands. Á kynningarfundinum munu sérfræðingar Deloitte einnig fara yfir helstu dæmi og svara spurningum fyrirtækja um einstök tilvik. Fulltrúar Íslandsstofu munu jafnframt kynna starfsemi útflutningsþjónustu og mögulega aðstoð til fyrirtækja.
