Samherji hefur óskað eftir undanþágu frá yfirtökuskyldu í Eimskip vegna þeirra sérstöku aðstæðna sem hafa skapast á fjármálamarkaði vegna útbreiðslu kórónaveirunnar. Þetta kemur fram í tilkynningu frá félaginu sem barst Kauphöllinni síðdegis í dag.

„Við teljum ekki skynsamlegt að tilboð um yfirtöku fari fram í skugga þess mikla umróts sem nú á sér stað,“ segir Björgólfur Jóhannsson, starfandi forstjóri Samherja.

Með tilkynningu og flöggun hinn 10. mars síðastliðinn kom fram að Samherji Holding, systurfélag Samherja, hefði aukið hlut sinn í Eimskip um 3,05 prósent og ætti í kjölfarið 30,11 prósenta hlut í flutningarisanum. Samherji Holding myndi í framhaldinu senda öðrum hluthöfum Eimskips yfirtökutilboð um kaup á hlutabréfum þeirra innan fjögurra vikna eins og áskilið væri í lögum.

Með bréfi til fjármálaeftirlits Seðlabanka Íslands í dag óskaði Samherji Holding eftir undanþágu frá yfirtökuskyldunni vegna þeirra sérstöku aðstæðna sem hefðu skapast á fjármálamarkaði vegna útbreiðslu Covid-19. Í lögum um verðbréfaviðskipti er fjármálaeftirlitinu veitt heimild til að veita slíka undanþágu ef sérstakar ástæður mæla með því.

Í beiðni Samherja Holding kemur fram að uppi séu fordæmalausar aðstæður vegna þeirrar óvissu sem Covid-19 hafi skapað í efnahagsumhverfi Íslands.

„Á örfáum dögum,“ segir Björgólfur, „hefur allt efnahagsumhverfið breyst stórlega, langt umfram það sem spár gerðu ráð fyrir. Áhrifin eru afar víðtæk og keðjuverkandi á fjármálamarkaði og á efnahagslífið í heild sinni“. Ekki sé skynsamlegt að tilboð um yfirtöku fari fram í skugga þessa mikla umróts sem nú eigi sér stað.

„Við vonum öll að aðstæður verði heppilegri fyrr en síðar. Trú okkar á framtíð Eimskips hefur ekkert breyst,“ segir Björgólfur í tilkynningunni.

Málið er nú til skoðunar hjá fjármálaeftirliti Seðlabanka Íslands. Það getur sett skilyrði fyrir undanþágunni, til dæmis varðandi frest til að selja hluti sem eru umfram þrjátíu prósenta eignarhlut og meðferð atkvæðisréttar á því tímabili, eftir því sem fram kemur í tilkynningunni.