Innlent

Vilja fá fleiri konur til liðs við Völku

Auður Ýr Sveins­dótt­ir var nýverið ráðin aðstoðarfram­kvæmda­stjóri Völku, hátæknifyrirtækis í sjávarútvegi.

Valka hefur vaxið mjög hratt undanfarin misseri að sögn Auðar. Fréttablaðið/Ernir

Auður Ýr Sveins­dótt­ir var nýverið ráðin aðstoðarfram­kvæmda­stjóri Völku, hátæknifyrirtækis í sjávarútvegi, en hún hef­ur und­an­far­in tvö ár stýrt rekstr­ar­sviði fyr­ir­tæk­is­ins. „Okkur er mjög hugleikið að fá fleiri konur til liðs við okkur og hefur það verið viss áskorun.“

Hver eru þín helstu áhugamál?

Samvera með fjölskyldu og vinum fyrst og fremst! Ég stunda Crossfit í Sporthúsinu, iðka jóga, fer á skíði með fjölskyldunni og svo er golf nýjasta áskorunin. Við eigum fimm ára Beagle-tík sem fer með mér og öðrum fjölskyldumeðlimum í gönguferðir í bakgarðinum sem er í jaðri höfuðborgarsvæðisins. Þar eigum við dýrmætar stundir í frábærum félagsskap í gullfallegri náttúru. Sumarhús fjölskyldunnar er heimsótt eins oft og mögulegt er og þar er nóg að dytta að og lagfæra. Svo eru prjónarnir oftar en ekki við höndina, en prjónastundunum hefur þó því miður fækkað eftir því sem börnin hafa stækkað.

Hvernig er morgunrútínan þín?

Klukkan hringir 6.45 og börnin spretta auðvitað fram úr. Því næst tekur við mjög mikilvæg stund þegar rennt er yfir fyrstu fréttir dagsins yfir espressóbollanum. Eftir önnur hefðbundin morgunverk er ég mætt til vinnu rétt upp úr klukkan 8. Þá er það létt spjall við samstarfsfólk við kaffivélina og því næst hefst undirbúningur dagsins. Mér finnst mikilvægt að vera vel undirbúin fyrir verkefni dagsins og reyni að skipuleggja mig vel. Í kviku umhverfi eins og hjá Völku geta hlutirnir breyst hratt og því er oft tilefni til að endurskoða forgangsröðina áður en fyrstu skrefin eru tekin inn í daginn.

Hvaða ráðstefnu eða fyrirlestur sóttirðu síðast?

Ég sótti fyrirlestur um Lean hugmyndafræðina sem haldinn var á vegum Stjórnvísi sl. vor. Ég hef verið meðlimur í Stjórnvísi til margra ára og ég legg mig fram við að mæta á viðburði ýmissa hópa sem þar eru starfræktir til að auka þekkingu mína og viðhalda tengslum í viðskiptalífinu.

Hvaða bók ertu að lesa eða last síðast?

The Nightingale eftir Kristin Hannah. Ótrúlega vel skrifuð bók um áhrif seinni heimsstyrjaldarinnar á líf fjölskyldu í Frakklandi. Ég mæli hiklaust með henni!

Hverjar eru helstu áskoranirnar í starfinu?

Valka hefur vaxið mjög hratt undan­farin misseri og það teygist vel á öllum þráðum í þannig aðstæðum. Helstu áskoranir í mínu starfi eru að halda vel utan um starfsemi og starfsfólk fyrirtækisins á þessum krefjandi en skemmtilegu tímum og um leið uppfylla væntingar viðskiptavina okkar. Með samhentu átaki og samvinnu allra starfsmanna sem aldrei virðast sjá vandamál, aðeins lausnir, hefur náðst að byggja upp gríðarlega þekkingu, mikilvæga innviði og styrkar stoðir og þannig undirbúið fyrirtækið fyrir hraðskreiða framtíðina, sem ég tel að sé mjög björt.

Hverjar eru helstu áskoranirnar í rekstrarumhverfinu?

Fyrst og fremst er það skortur á stöðugleika í hagkerfinu, gengið og óvissan sem þessum breytum fylgir. Okkur er mjög hugleikið að fá fleiri konur til liðs við okkur og hefur það verið viss áskorun. Við erum þó farin að finna fyrir meira framboði á konum í hugbúnaðargeiranum en áður sem er gleðiefni. Þessi aukning hefur skilað sér til okkar hjá Völku, þó að hlutfall kvenna í fyrirtækinu sé enn of lágt. En við látum ekki deigan síga og höldum áfram að mjaka okkur í átt að því markmiði okkar að jafna kynjahlutföll í fyrirtækinu.

Hvaða breytingar sérðu fyrir þér hjá Völku á næstu árum?

Valka mun halda áfram að stækka og þroskast og ég er fullkomlega viss um að fyrirtækið muni verða fremst í röð jafningja í sjávarútvegi innanlands og erlendis. Valka hefur í röðum sínum ótrúlega hæft starfsfólk sem leggur mikið á sig til að greiða veg félagsins. Framtíðin er spennandi fyrir okkur og viðskiptavini okkar.

Ef þú þyrftir að velja allt annan starfsframa, hver yrði hann?

Ég hef mjög sterka tengingu við störf mín hjá Völku. Föðuramma mín vann alla tíð í frystihúsi og afi var trillukarl vestur í Bolungarvík. Ég hef alltaf haft áhuga á sjónum og því sem tengist honum og þess vegna ákvað ég að læra sjávarvísindi löngu áður en ég útskrifaðist úr Verzló. En einn draum el ég með mér og það er að læra sálfræði. Hvort ég gerði hana að starfsframa get ég ekki sagt til um núna, en allt sem tengist mannlegum samskiptum er mér svo sannarlega hugleikið.

Hvar sérðu þig eftir tíu ár?

„Fyrst og fremst að fylgja börnunum mínum út í lífið, vonandi fær í flestan sjó! Ég hef mjög skýra framtíðarsýn, hvert skal haldið og hvernig. Vonandi verð ég sátt við þær ákvarðanir sem ég hef tekið til að uppfylla þessa sýn þegar ég lít um öxl eftir tíu ár.

Helstu drættir


Nám:
„Eftir útskrift úr Verzlunarskólanum fyrir rúmum 22 árum flutti ég til Suður-Karólínu í Bandaríkjunum og lærði þar sjávarvísindi og umhverfisfræði í Coastal Carolina University, fór svo í master í umhverfisefnafræði í University of Maryland þar sem ég rannsakaði uppsöfnun kvikasilfurs í fiski í uppistöðulónum í Maryland-ríki og tengsl við magn efnisins í vatni og fæðu.“

Störf: „Aðstoðarútsendingarstjóri frétta Stöðvar 2 (fyrir og meðan á háskólanámi stóð); svæðisstjóri hjá Analab Corporat­ion í Maryland í Bandaríkjunum; sérfræðingur í mati á umhverfis­áhrifum hjá Skipulagsstofnun; leiðtogi gæðastjórnunar og stöðugra umbóta hjá álveri Rio Tinto í Straumsvík; rekstrarstjóri hjá Völku ehf.; aðstoðarframkvæmdastjóri hjá Völku ehf.“

Fjölskylduhagir: „Ég er gift William S. Johnstone III sem er deildarstjóri hjá Vodafone og við eigum tvö börn, Karólínu Hrönn 13 ára og Thomas Ásgeir 10 ára.“

Athugasemdir

Auglýsing
Auglýsing

Tengdar fréttir

Innlent

Hækkun snerist í lækkun eftir fréttir af WOW

Innlent

Tvö framboð til stjórnar VÍS dregin til baka

Innlent

At­lants­olía vildi kaupa elds­neytis­stöðvar af N1

Auglýsing

Nýjast

Fjárfesting Indigo í WOW nemi allt að 9,4 milljörðum

Baldvin kaupir fyrir tugi milljóna í Eimskip

Icelandair hækkar verulega í fyrstu viðskiptum

Ferðamönnum mun að öllum líkindum fækka

Aurum Holding-málið ekki fyrir Hæstarétt

Mikil viðskipti með bréf Reita

Auglýsing