Í stjórn Samtaka menntatæknifyrirtækja eru Íris E. Gísladóttir hjá Evolytes, Eloise Freygang hjá Beedle, Jón Gunnar Þórðarson hjá Mussila, Hinrik Jósafat Atlason hjá Atlas Primer og Helgi S. Karlsson hjá Beanfee.

Íris E Gísladóttir, formaður Samtaka menntatæknifyrirtækja og stofnandi Evolytes, segir að menntatæknifyrirtæki hafi átt erfitt uppdráttar hér á landi meðal annars vegna hamlandi regluverks.

„Við viljum auka tengsl við atvinnulífið, rannsóknasamfélagið og skólasamfélagið, allt frá leikskóla upp í háskóla. Kennsla fyrir störf framtíðarinnar byggir á aukinni notkun upplýsingatækni og því er mikilvægt að menntatækni verði nýtt til fulls í skólakerfinu,“ segir Íris.

Í Samtökum menntatæknifyrirtækja eru fyrirtæki sem öll starfa í menntatækniiðnaði sem er á alþjóðavísu metinn á 24.000 milljarða króna með ríflega 16 prósenta stöðugan vöxt milli ára. Menntatækni er rótgróin iðngrein sem á sér áratuga sögu en á Íslandi er greinin tiltölulega ung. Hún hefur þó burði til að bæta árangur nemenda hér á landi, auka gildi íslenskunnar og renna fleiri stoðum undir íslenskt hagkerfi. Með aukinni nýtingu á menntatækni er hægt að umbylta kennsluaðferðum og ná meðal annars betri árangri í læsi og stærðfræði. Samtökin hafa það að markmiði að vinna að hagsmunum og stefnumálum menntatæknifyrirtækja, ásamt því að stuðla að vexti og viðgangi greinarinnar í heild sinni íslensku menntakerfi til framdráttar. Heiti samtakanna á ensku er Icelandic Edtech Industry, IEI.