Vilhelm Már Þorsteinsson, forstjóri Eimskips, segir úrskurð yfirskattanefndar mikil vonbrigði og að hún skekki samkeppnisstöðu íslenskra kaupskipaútgerða gagnvart keppinautum erlendis.

Þetta er haft eftir Vilhelm í tilkynningu um uppgjör Eimskips fyrir fyrsta ársfjórðung. Eimskipafélag Íslands tapaði 2,5 milljónum evra, jafnvirði 347 milljóna króna, á fyrsta fjórðungi ársins 1,6 milljóna tap á sama ársfjórðungi 2018.

Þrátt fyrir bætta afkomu af rekstri er engu að síður tap eftir skatt á tímabilinu. Þar spilar stærst einskiptis skattaleg gjaldfærsla að fjárhæð 3,4 milljónir evra. Án þessa einskiptisliðar væri hagnaður 0,9 milljónir evra.

Eins og kom fram í tilkynningu í mars síðastliðnum tapaði félagið kærumáli fyrir Yfirskattanefnd. Málið fjallaði um hvort skattleggja skyldi afkomu erlendra eignarhaldsfélaga skipa félagsins í móðurfélaginu á Íslandi samkvæmt svokölluðum CFC reglum.

„Úrskurður Yfirskattanefndar er félaginu mikil vonbrigði og skekkir enn frekar samkeppnisstöðu kaupskipaútgerðar íslenskra félaga og er á skjön við þá umgjörð sem búin er kaupskipaútgerðum í löndunum í kringum okkur,“ segir Vilhelm.

Afkoma Eimskipts var yfir væntingum og nefnir Vilhelm að EBITDA á fyrsta fjórðungi hafi ekki verið betri síðan á árinu 2009.

„Jákvæður viðsnúningur var í afkomu félagsins í Noregi þrátt fyrir minna flutningsmagn þar, sem skýrist m.a. af lægri rekstrarkostnaði en félagið rekur nú tveimur færri skip í Noregi miðað við sama tímabil í fyrra. Áframhaldandi vöxtur hefur verið í Trans-Atlantic flutningum og skipti félagið út einu skipi fyrir stærra skip á siglingaleið félagsins til Norður-Ameríku á tímabilinu til að svara aukinni eftirspurn,“ segir Vilhelm.

„Enn fremur var góður vöxtur í alþjóðlegri frystiflutningsmiðlun en afkoma af henni olli nokkrum vonbrigðum á síðasta ári. Góður gangur var í innanlands starfseminni á Íslandi og loks eru hagræðingar- og skipulagsaðgerðir síðustu mánaða byrjaðar að skila sér í batnandi afkomu. Eftir mikinn ytri vöxt síðustu ár hafa verkefni þessa ársfjórðungs m.a. verið að skerpa á áherslum í rekstri og samþætta aðskildar einingar í sömu starfsemi með það að markmiði að auka skilvirkni og arðsemi.“