Sjóvá hagnaðist um 2.065 milljónir á fyrsta ársfjórðungi samanborið við 465 milljón króna tap á sama tíma fyrir ári.

„Afkoman á fyrsta ársfjórðungi er afar góð og einkennist af áframhaldandi heilbrigðum iðgjaldavexti og mjög góðri afkomu af fjárfestingastarfsemi,“ segir Hermann Björnsson, forstjóri Sjóvár, í tilkynningu til Kauphallarinnar. „Ávöxtun á hlutabréfamörkuðum hefur verið gríðarlega góð á fjórðungnum og var afkoman af hlutabréfasafni í takt við það og raunar langt yfir því sem alla jafna má vænta,“ segir hann.

Hagnaður af fjárfestingarstarfsemi fyrir skatta var 1.652 milljónir króna á fyrsta ársfjórðungi samanborið við tap upp á 552 milljónir króna á sama tíma fyrir ári. Ávöxtunin var 3,8 á tímabilinu.

Hagnaður af vátryggingastarfsemi fyrir skatta var 556 milljónir króna en á sama tíma fyrir ári nam sá hagnaður 185 milljónum króna. Samsettahlutfallið lækkaði í 91,4 prósent en var 98,5 prósent á sama tíma fyrir ári.

Hermann segir að í vátryggingastarfseminni hafi heilbrigður iðgjaldavöxtur á milli tímabila mikið að segja en eigin iðgjöld uxu um 6,3 prósent á milli ára, vel umfram eigin tjón. „Iðgjaldavöxturinn er drifinn áfram af vexti á einstaklingsmarkaði á meðan iðgjöld á fyrirtækjamarkaði dragast saman á milli tímabila. Einnig ber að hafa í huga að tíðarfarið í ár á þessum ársfjórðungi var gott og hefur jákvæð áhrif á afkomu fjórðungsins. Allt frá 2016 eða 5 ár í röð hefur afkoma af vátryggingastarfsemi verið jákvæð, sem er í takt við það sem stjórnendur hafa lagt ríka áherslu á allt frá því að félagið var skráð á hlutabréfamarkað.“