Peningastefnunefnd Seðlabanka Íslands hefur ákveðið að lækka vexti bankans um 0,25 prósentur og verða meginvextirnir því þrjú prósent. Vextir bankans hafa lækkað um 1,5 prósentur frá því í maí á þessu ári.

Í yfirlýsingu nefndarinnar kemur fram að samkvæmt nýrri þjóðhagspá Seðlabankans hafa horfur um hagvöx á seinni hluta ársins versnað frá fyrri spá bankans í ágúst. Hagvöxtur á fyrri hluta ársins var hins vegar meiri en spáð var og er því gert ráð fyrir 0,2 prósenta samdrætti á árinu öllu eins og í ágúst. Horfur fyrir næsta ár hafa einnig versnað og er nú spáð 1,6 prósenta hagvexti.

Tólf mánaða verðbólga mældist 2,8 prósent í október en undirliggjandi verðbólga hefur hins vegar reynst vera þrálátari, að því er segir í yfirlýsingunni. Horfur eru á því að verðbólgan hjaðni hraðar en áður var spáð og að hún verði komin í markmið – 2,5 prósent – undir lok þessa árs.

„Verðbólguvæntingar hafa haldið áfram að lækka og eru við markmið miðað við flesta mælikvarða. Taumhald peningastefnunnar hefur því aukist lítillega milli funda,“ að því er fram kemur í yfirlýsingu peningastefnunefndarinnar.

Áhrif vaxtalækkana bankans frá því í vor eru sagðar enn eiga eftir að koma fram að fullu. Lækkunin hafi stutt við eftirspurn og miðað við spá bankans ætti núverandi vaxtastig að duga til að tryggja verðstöðugleika til meðallangs tíma og fulla nýtingu framleiðsluþátta.

„Þá mun boðuð slökun í aðhaldi ríkisfjármála leggjast á sömu sveif. Efnahagshorfur gætu hins vegar verið of bjartsýnar, einkum vegna óvissu í alþjóðlegum efnahagsmálum,“ segir í yfirlýsingunni.