Áætlaðar verklegar framkvæmdir hins opinbera á þessu ári eru samtals 139 milljarðar króna samkvæmt því sem fram kemur á Útboðsþingi SI 2021. Þetta er 7,4 milljörðum króna meira en kynnt var á Útboðsþingi SI 2020.

Um er að ræða talsverðar framkvæmdir sem ætlað er að efla innviði hagkerfisins. Boðaðar framkvæmdir eru um 4,5 prósent af væntri landsframleiðslu ársins sem er viðlíka og á síðasta ári þegar þær námu 4,6 prósent af landsframleiðslu. Þetta kemur fram í greiningu Samtaka iðnaðarins.

Mikil uppsöfnuð þörf fyrir innviðaframkvæmdir

„Það er jákvætt að verið sé að boða til umfangsmikilla framkvæmda þar sem innviðaframkvæmdir eru fjárfesting í hagvexti framtíðarinnar. Mikil uppsöfnuð þörf er fyrir innviðaframkvæmdir víða og henta því framkvæmdirnar vel til að skapa hagkerfinu nauðsynlega viðspyrnu og störf á tímum mikils samdráttar í efnahagslífinu,“ segir í greiningunni.

Reykjavíkurborg fyrirhugar framkvæmdir fyrir 28,6 milljarða króna í ár sem er töluvert meira en í fyrra þegar borgin boðaði framkvæmdir fyrir 19,6 milljarða króna, þar sem verið er að fjárfesta mjög víða með einkaaðilum.
Fréttablaðið/Stefán

Umfangsmestu framkvæmdirnar boða Reykjavíkurborg, Vegagerðin og Framkvæmdasýsla ríkisins (FSR). Reykjavíkurborg fyrirhugar framkvæmdir fyrir 28,6 milljarða króna í ár sem er töluvert meira en í fyrra þegar borgin boðaði framkvæmdir fyrir 19,6 milljarða króna, þar sem verið er að fjárfesta mjög víða með einkaaðilum. Um er að ræða fjölbreytt verkefni fyrir allar tegundir verktaka. Vegagerðin boðar nú framkvæmdir fyrir 27,6 milljarða króna sem er nokkur lækkun frá boðuðum framkvæmdum í fyrra þegar þær námu 38,7 milljörðum króna. Af fjárheimildum stofnunarinnar fyrir árið í ár eru 15,5 milljarðar króna til nýframkvæmda og ríflega 12 milljarðar króna til viðhaldsframkvæmda. Meðal verkefna eru samvinnuverkefni með einkaaðilum, svokölluð PPP verkefni, fyrir um 9 milljarða króna.

Framkvæmdasýsla ríkisins áætlar nú framkvæmdir fyrir 22,8 milljarða króna á árinu sem er veruleg aukning frá því í fyrra þegar hún boðaði 9,3 milljarða króna framkvæmdir. Um er að ræða aukningu sem skýrist af fjárfestingarátaki stjórnvalda. Alls eru þetta 91 útboð fjögurra ríkisaðila, þ.e. FSR, Ríkiseigna, Háskóla Íslands og Landspítalans háskólasjúkrahúss.

Boðaðar framkvæmdir segja ekki alla söguna

Boðaðar framkvæmdir segja hins vegar ekki alla söguna hvað varðar framkvæmdir á árinu. Áætluð útboð á árinu eru verk sem klárast ekki endilega innan ársins. Auk þess verður stundum ekki af útboðum eða þau frestast.

„Nokkur munur getur því verið á boðuðum framkvæmdum og þeim sem ráðist er í á árinu. Þannig var heildarverðmæti framkvæmda á árinu 2020 um 29 prósent minna en boðað var á Útboðsþingi SI 2020. Vegur þar þungt að framkvæmdir Isavia voru ekki nema tæpar 200 milljónir króna í fyrra samanborið við framkvæmdaáætlun upp á 21 milljarð króna í ár. Heimsfaraldur kórónuveiru hafði þar augljóslega mikil áhrif,“ segir í greiningunni.

Reykjavíkurborg boðaði framkvæmdir fyrir 19,6 milljarða króna á Útboðsþingi SI í fyrra auk 2,5 milljarða króna í fjárfestingarátak vegna COVID-19. Heildarverðmæti framkvæmda hljóðaði upp á 21,1 milljarð króna sem er einum milljarði minna en áætlanir ársins gerðu ráð fyrir. Framkvæmdir Vegagerðarinnar á síðasta ári voru 7,6 milljörðum króna minni en boðaðar framkvæmdir á Útboðsþingi SI 2020. Auk þess sem nánast engar framkvæmdir voru á vegum Faxaflóahafna og Orku náttúrunnar á síðasta ári, samkvæmt samantekt SI.