Hagstofan birti nú rétt áðan vísitölu neysluverðs í júlí.

Vísitala neysluverðs, miðuð við verðlag í júlí 2022, er 553,5 stig (maí 1988=100) og hækkar um 1,17 prósent frá fyrri mánuði. Vísitala neysluverðs án húsnæðis er 459,4 stig og hækkar um 0,94 prósent frá júní 2022.

Sumarútsölur hafa verið í gangi og lækkaði verð á fötum og skóm um 6,8 prósent (áhrif á vísitöluna -0,24 prósent) og verð á húsgögnum og heimilisbúnaði lækkaði um 2,6 prósent (-0,17 prósent).

Kostnaður vegna búsetu í eigin húsnæði (reiknuð húsaleiga) hækkaði um 2,4 prósent (0,47 prósent) og verð á flugfargjöldum hækkaði um 38,3 prósent (0,72 prósent).

Hækkun á flugfargjöldum til útlanda er tilkomin vegna verðhækkunar í júlí 19,9 prósent (0,43 prósent), en einnig vegna þess að flugfargjöld voru vanmetin í júní 2022 (0,29 prósent). Hækkun flugfargjalda í júní hefði átt að vera 20,4 prósent ef ekki hefði komið til vanmats. Leiðréttingin hefur ekki áhrif á birt gildi vísitölu neysluverðs í júní.

Síðastliðna tólf mánuði hefur vísitala neysluverðs hækkað um 9,9 prósent og vísitala neysluverðs án húsnæðis um 7,5 prósent.

Vísitala neysluverðs samkvæmt útreikningi í júlí 2022, sem er 553,5 stig, gildir til verðtryggingar í september 2022. Vísitala fyrir eldri fjárskuldbindingar, sem breytast eftir lánskjaravísitölu, er 10.929 stig fyrir september 2022.