Valur Hrafn Einarsson hefur verið ráðinn tæknistjóri hjá hugbúnaðarfyrirtækinu Stokki Software. Stokkur Software hefur þróað mörg af vinsælustu öppum landsins eins og Domino’s, Lottó, Lengjuna, Aur, Strætó og Einkaklúbb Arion banka.
Hann hefur víðtæka reynslu úr tæknigeiranum og hefur frá árinu 2018 stýrt vefþróunardeild Sýnar. Þar sá hann meðal annars um þróun á tækniumhverfi fyrir vísi.is, sjónvarpsappi Stöðvar 2 og útvarpsöppum Sýnar. Valur hefur lokið B.Sc gráðu í hugbúnaðarþróun frá Háskólanum í Reykjavík.
„Reynsla Vals mun styrkja Stokk Software í sinni vegferð og hann kemur með verðmæta þekkingu á öllum sviðum starfsemi okkar. Það er mikil eftirspurn á stafrænum lausnum og stafræn þróun fyrirtækja í hámarki svo við erum spennt að fá Val til okkar til að leiða tækniþróun fyrirtækisins áfram,“ segir Árdís Björk Jónsdóttir, framkvæmdastjóri Stokks.
