Valgeir M. Baldursson hefur verið ráðinn forstjóri Terra. Valgeir hefur undanfarin ár starfað sem fjármálastjóri og framkvæmdastjóri hjá VÍS. Þar áður var Valgeir forstjóri Skeljungs en hann hefur gegnt fjölda trúnaðarstarfa hjá ýmsum fyrirtækjum og félögum og er það fagnaðarefni að fá svo reynslumikinn mann að stjórn félagsins.

Þetta kemur fram í tilkynningu frá Terra en þar segir að Gunnar Bragason, sem verið hefur forstjóri Terra, muni starfa áfram með félaginu sem ráðgjafi næstu misserin og samið hefur verið við hann um að leiða starf félagsins, hvað varðar mögulega aðkomu þess að sorpbrennslu og útflutning á sorpi á næstu mánuðum. Gunnar hefur starfað hjá félaginu síðan í janúar 2008, síðustu ár sem forstjóri.

Valgeir starfaði áður sem fjármálastjóri og framkvæmdastjóri hjá VÍS frá árinu 2017.

„Terra var valið Umhverfisfyrirtæki atvinnulífsins 2020 og sinnir alhliða umhverfisþjónustu fyrir sveitarfélög og nokkur þúsund fyrirtæki um land allt. Meginstoð fyrirtækisins er flokkun og endurvinnsla og Terra leiðbeinir og hjálpar fyrirtækjum að bæta umgengni sína við jörðina með því að koma öllum endurvinnsluefnum sem falla til í viðeigandi farveg. Að skilja ekkert eftir er þýðing á hugtakinu „Zero Waste“ og lýsir vel markmiðum fyrirtækisins í endurvinnslu og meðhöndlun úrgangs,“ segir í tilkynningunni.