Áætlaður heildarkostnaður í tengslum við útgáfu hluta í Síldarvinnslunnar og töku þeirra til viðskipta nemur um 265 milljónum króna, að því er kemur fram í lýsingu hlutabréfa fyrir útboðið. Útgefandinn, Síldarvinnslan, mun ekki leggja kostnað á fjárfesta vegna sölu hlutabréfanna eða töku þeirra til viðskipta.

Fyrirtækjaráðgjöf Landsbankans var ráðin af útgefanda til þess að hafa umsjón með komandi hlutafjárútboði útgerðarfélagsins og lögmannsstofan LEX er einnig í ráðgefandi hlutverki.

Eigendur Síldarvinnslunnar hyggjast selja á bilinu 26,33 til 29,33 prósenta hlut í komandi útboðinu. Samherji mun selja að lágmarki 12 prósent, Kjálkanes 12 prósent, Eignarhaldsfélagið Snæfugl 1 prósent, Hraunlón ehf 1 prósent og Síldarvinnslan selur eigin bréf sem samsvara 0,73 prósent af heildarhlutafé. Samherji er í dag stærsti hluthafi Síldarvinnslunnar með tæplega 45 prósenta hlut

Í útboðslýsingunni kemur einnig fram að árið 2021 sé talið munu verða það besta í rekstri Síldarvinnslunnar í mörg ár, en rekstrarhagnaður fyrir afskriftir, fjármagnsliði og skatta (EBITDA) er áætlaður 72 til 77 milljónir Bandaríkjadala. Á árunum 2015 til 2020 var lá sama tala á bilinu 44 til 63 milljónir, þó hafa beri í huga að Síldarvinnslan hefur stækkað reksturinn nokkuð með yfirtöku á fyrirtækjum á síðastliðnum árum.

Miðað við útboðsgengið, eins og áður hefur komið fram í umfjöllun Markaðarins, er verðmæti alls hlutafjár Síldarvinnslunnar talið vera á bilinu um 93,5 til 99 milljarðar króna.

Hlutafjárútboðið mun fara fram dagana 10. til 12. maí en áætlað er að fyrsti viðskiptadagur með hlutabréf Síldarvinnslunnar í Kauphöllinni verði 27. maí næstkomandi.