Í kringum 40 starfsmenn Bílanaust missa vinnuna vegna rekstrarstöðvunar hjá varahlutakeðjunni og þeir fá að öllum líkindum ekki greidd laun næstu mánaðamót.

Þetta staðfestir Bryndís Guðnadóttir, forstöðumaður kjaramálasviðs hjá VR, í samtali við Fréttablaðið en í morgun var greint var greint frá því að verslunum Bílanausts hefði verið lokað og starfsmenn sendir heim. „Þetta eru í kringum 40 starfmenn, þar af 35 hjá VR,“ segir hún.

Sjá einnig: Verslanir Bílanausts lokaðar

Bryndís segir að Bílanaust hafi boðið VR að fá að vera með á starfsmannafundinum í morgun. Þannig hafi VR getað upplýst starfsmenn um næstu skref.

„Ég fagna því þegar fyrirtæki leyfa okkur að sitja fundina. Það var eins vel að þessu staðið og mögulega hægt er,“ segir Bryndís.

Sjá einnig: Vafi leikur á rekstrarhæfi Bílanausts

Þá er ólíklegt að starfsmenn fái launagreiðslu næstu mánaðamót.

„Við gerum kröfu um uppsagnarfrest og þá fer málið í ákveðið ferli. Starfsmenn geta framselt kröfuna til Vinnumálastofnunar sem ábyrgðarsjóð launa kemur til með að greiða þannig að fólk fær launagreiðslu þarnæstu mánaðamót. En það er ekki hægt að framselja kröfu fyrir janúarmánuð vegna þess að hann er ekki hluti af uppsagnarfresti.“