Sæmundur Sæmundsson hefur ákveðið að láta af störfum sem forstjóri Borgunar, þetta kemur fram í tilkynningu frá fyrirtækinu.

Stjórn fyrirtækisins tilkynnti að Eduardo Pontes og Marcos Nunes taki við en þeir munu sameiginlega gegna hlutverki forstjóra.

Breytingarnar verða í kjölfar þess að Salt Pay hefur verið samþykkt af fjármálaeftirliti Seðlabanka Íslands sem nýr rekstraraðili Borgunar.

Sæmundur segir þetta vera góða tímasetningu fyrir sig að stíga til hliðar hjá Borgun.

„Ég er ákaflega spenntur, fyrir hönd starfsfólks Borgunar, fyrir þessum næsta kafla þar sem ég veit að Salt Pay hyggst sækja fram af krafti á alþjóðavísu. Ég er stoltur af að hafa leitt fyrirtækið í gegnum mikið breytingatímabil þar sem við náðum því markmiði að selja fyrirtækið. Ég er sérstaklega ánægður að Borgun fái eigendur sem ætli að byggja á þeim öfluga grunni sem teymið okkar hefur byggt upp síðustu ár“.

„Stjórn Borgunar vill þakka Sæmundi fyrir störf hans og forystu á þessu umbreytingartímum og óskar honum velfarnaðar í nýjum verkefnum. Hann helgaði sig algerlega því verkefni að tryggja að vegferð þessa 40 ára fyrirtækis geti haldið áfram. Við erum Sæmundi þakklát fyrir að leiða Borgun í gegnum þessa mikilvægu tíma,“ segir Elín Jónsdóttir, stjórnarformaður Borgunar.

Eins og fram kom að ofan þá verða nýir forstjórar Borgunar Edu Pontes og Marcos Nunes. Edu starfaði áður sem forstjóri brasilíska fjártæknifyrirtækisins Stone Co og Marcos starfaði áður sem framkvæmdastjóri alþjóðlegrar færsluhirðingar og ytri vaxtar hjá sænska greiðslumiðlunarfyrirtækinu Bambora.