Tvær lögmannsstofur, Lögmenn Höfðabakka og Málflutningsstofa Reykjavíkur, hafa sameinast í eitt fyrirtæki undir heitinu MAGNA lögmenn. Hjá nýju stofunni munu starfa 13 lögmenn og lögfræðingar..

Skrifstofur MAGNA lögmanna eru í endurnýjuðu húsnæði að Höfðabakka 9, Reykjavík, þar sem Lögmenn Höfðabakka hafa verið til húsa síðustu fjóra áratugi. Eigendur hins sameinaða félags eru lögmennirnir Bjarki Þór Sveinsson, Daníel Isebarn Ágústsson, Einar Farestveit, Flóki Ásgeirsson, Gunnar Ingi Jóhannsson, Kristín Ólafsdóttir, Páll Rúnar Mikael Kristjánsson og Þórður Bogason, sem jafnframt er framkvæmdastjóri MAGNA lögmanna.

Í fréttatilkynningu er haft eftir Þórði að sameiningin sé eðlileg þróun sem samrýmist stefnumótun beggja, að skapa stofu með fjölhæfa og öfluga liðsheild sem veiti bestu lögmannsþjónustu sem völ er á og sé í takt við kröfur samtímans um nútímalega lögmannsþjónustu, árangur og skilvirkni.

Lögmannsstofurnar tvær hafa vegna aukinna umsvifa átt samstarf um skeið í nokkrum málum með góðum árangri. Með sameiningu verður til lögmannsstofa sem veitir alla almenna lögfræðiþjónustu og býr yfir sérþekkingu á mörgum sviðum. Má þar nefna viðskipta- og félagarétt, þjónustu við fyrirtæki á fjármála- og orkumarkaði, skipta- og sifjarétt, sem og á sviði stjórnsýslu- og sveitarstjórnarréttar.