Að ósk Tryggva Þórs Haraldssonar forstjóra RARIK hefur orðið að samkomulagi milli hans og stjórnar fyrirtækisins, að hann láti af störfum sem forstjóri þann 31. mars næstkomandi. Tryggvi Þór, sem í þeim mánuði verður 66 ára, mun þó áfram vera starfsmaður RARIK og starfa sem ráðgjafi stjórnar og nýs forstjóra og enn fremur í sérstökum verkefnum. Þetta kemur fram í tilkynningu.

Stjórn RARIK er að hefja ráðningarferli til að ráða nýjan forstjóra. Tryggvi Þór hefur starfað sem forstjóri RARIK í á nítjánda ár og þar á undan í ýmsum öðrum störfum innan fyrirtækisins í yfir 23 ár meðal annars sem umdæmisstjóri á Norðurlandi eystra í 10 ár. Hann hefur því starfað hjá fyrirtækinu í tæp 42 ár.

Í bréfi til starfsmanna segir Tryggvi Þór meðal annars: „… eins og sum ykkar vita hefur það lengi verið skoðun mín að það sé ekki heppilegt fyrir fyrirtæki að forsvarsmenn þeirra haldi starfi sínu allt þar til þeir neyðast til að hverfa úr því vegna aldurs og fara þá úr fyrirtækinu með reynslu sína og þekkingu, án þess að hún yfirfærist með eðlilegum hætti til eftirmanna. Heppilegra sé að víkja úr starfi stjórnanda fyrr, þótt áfram sé starfað hjá fyrirtækinu.“