Samgöngu- og sveitarstjórnarráðuneytið hefur gert nýjan samning við Icelandair um að tryggja lágmarksflug til Bandaríkjanna til og með 31. mars næstkomandi. Samningurinn gerir ráð fyrir að flogið verði minnst tvisvar í viku til Boston á tímabilinu. Þetta kemur fram í tilkynningu frá samgöngu- og sveitarstjórnarráðuneytinu.

Markmiðið er sem fyrr að tryggja lágmarks flugsamgöngur til og frá landinu vegna þeirra aðstæðna sem skapast hafa vegna COVID-19.

Samningurinn mögulega framlengdur

Auglýst var eftir tilboðum á evrópska útboðsvefnum TED (Tenders Electronic Daily) áður en gengið var til samninga. Icelandair var eina flugfélagið sem gerði tilboð. Allar tekjur Icelandair af flugi til Boston munu lækka greiðslur vegna samningsins. Gert er ráð fyrir að hægt verði að framlengja samninginn ef ástæða þykir til.

Sigurður Ingi Jóhannsson, samgöngu- og sveitarstjórnarráðherra, og Bogi Nils Bogason, forstjóri Icelandair,undirrituðu samninginn með rafrænum hætti.