Treble Technologies þróar tækni sem gerbyltir því hvernig hægt er að hanna hljóð og skapa hljóðupplifanir. Fyrirtækið hefur safnað átta milljónum evra frá fjárfestum og í styrki. Doktor Finnur Pind, stofnandi Treble, segir fólk oft ekki átta sig á áreiti sem stafað geti af hljóði.

Sprotafyrirtækið Treble Technologies, sem þróar tækni til hljóðhönnunar, hefur safnað 8 milljónum evra, eða jafnvirði 1,2 milljarða króna. Frá fjárfestum koma 5,5 milljónir evra og 2,5 milljónir evra eru styrkur frá Evrópska nýsköpunarráðinu (European Innovation Council).

Tæknin sem Treble Technologies þróar gerbyltir því hvernig hægt er að hanna hljóð og skapa hljóðupplifanir og nýtist í mörgum greinum.

Frumtak leiddi fjármögnunarlotuna sem er á klakstigi (e. seed stage) í samstarfi við NOVA, nýsköpunararm Saint-Gobain, sem er í hópi 500 stærstu fyrirtækja heims og framleiðir byggingarefni, auk ýmissa englafjárfesta.

Treble þróar hugbúnað á sviði hljóðhermunar (e. sound simulation) sem greinir og hannar hljóð í hvers kyns þrívíddarmódelum og hefur notagildi meðal annars við hönnun bygginga, bíla, hljóðtæknibúnaðar og sýndarheima (e. metaverse).

Tæknin, sem er einkaleyfisvarin, gerir notendum kleift að herma hljóð mun hraðar og nákvæmar en áður hefur verið hægt.

Treble á þegar í samstarfi við fjölda fyrirtækja um allan heim sem nota tæknina, svo sem nokkur stærstu tæknifyrirtæki í heimi, bílaframleiðendur og þekktar arkitektastofur.

Doktor Finnur Pind, stofnandi og framkvæmdastjóri Treble, segir að á aðeins tveimur árum hafi Treble tekist að þróa byltingarkennda tækni og hefja samstarf við leiðandi tæknifyrirtæki á heimsvísu.

„Fjármögnunin gerir okkur kleift að hleypa af stokkunum tæknilausninni og efla hana. Stefnt er á að setja hana formlega í loftið snemma á næsta ári og fjölga starfsmönnum,“ segir Finnur. Fólk átti sig oft ekki á því áreiti sem hljóð skapi. Rannsóknir sýni að það hefur mikil áhrif á heilsu, framleiðni og getu til að eiga samskipti.

„Okkar tækni mun leiða til þess að heimurinn – hvort sem litið er til raunheima eða þess stafræna – mun hljóma betur og hávaði verður minna vandamál,“ segir Finnur.

Að sögn Finns er hljóð afar mikilvægt fyrir upplifun í sýndarheimum.

„En rannsóknir hafa sýnt að aukin hljómgæði þar hafa mikil áhrif á upplifun fólks, jafnvel meiri en bætt grafík. Treble stefnir á að leika stórt hlutverk í þróun hljóðs á þeim vettvangi,“ segir Finnur.

Svana Gunnarsdóttir, framkvæmdastjóri og meðeigandi hjá Frumtaki Venture, segir tæknina sem Treble hefur þróað á skömmum tíma vera stórbrotna og að hraður uppgangur fyrirtækisins sé afar eftirtektarverður.

„Við hlökkum til að styðja við frekari vöxt félagsins og útbreiðslu tækninnar sem getur nýst á fjöldamörgum sviðum. Möguleikar Treble eru gífurlegir og félagið er í lykilstöðu til að verða leiðandi á þessu sviði á heimsvísu,“ segir Svana.

Treble Technologies hefur hlotið ýmis verðlaun og viðurkenningar á stórum alþjóðlegum ráðstefnum.

Hljóðverkfræðingarnir doktor Finnur Pind og Jesper Pedersen, sem báðir hafa mikla reynslu og þekkingu á hljóðhermun, stofnuðu Treble Technologies saman árið 2020.

Fyrstu skrefin að þróun tækninnar má rekja til rannsóknarstarfs í danska tækniháskólanum DTU sem gert var í samstarfi við svissneska háskólann EPFL og bandaríska háskólann Virginia Tech.

Þar leiddu saman hesta sína Finnur og aðrir leiðandi vísindamenn á sviði hljómburðar, ofurtölvuútreikninga og tölvunarstærðfræði í þróun byltingarkenndra nýjunga við að herma hljóð með meiri nákvæmni og skilvirkni en áður þekktist.