Heildarframboð á flugsætum í flugumferð um Keflavíkurflugvöll fer úr 7,9 milljón flugsætum á sumaráætlun Isavia í fyrra niður í 7,1 milljón flugsæta í ár. Það er samdráttur upp á 10 prósent.

Þetta kemur fram í tilkynningu frá Isavia. Mesta framboð á flugsætum verður til og frá Kaupmannahöfn að því er fram kemur í ferðaáætlunum flugfélaganna sem fljúga um Keflavíkurflugvöll á komandi sumri. Framboð á sætum til og frá Kaupmannahöfn eykst um níu prósent frá því sem var í fyrra. 

Þessar tölur gilda fyrir tímabilið apríl til október 2019 og gildir samanburðurinn fyrir sama tímabil í fyrra. Sumartímabilið samkvæmt skilgreiningu Alþjóðasamtaka flugfélaga, IATA (International Air Transport Association), nær frá lok mars ár hvert til loka októbermánaðar.

Icelandair áformar að auka sætaframboð sitt yfir sumartímann um 14 prósent nú í ár frá því sem var í fyrra. Áætlanir gera ráð fyrir að framboð sæta hjá WOW air dragist saman um 44 prósent. Hjá öðrum flugfélögum sem fljúga um  Keflavíkurflugvöll verður samanlagt um 4 prósenta samdráttur. Mismunandi er þó hvort félögin eru að minnka sætaframboð eða auka það. Wizz air eykur sætaframboð sitt um 15 prósent, SAS um 22 prósent og Finnair um 10 prósent á meðan easyJet minnkar framboðið um 11 prósent, British Airways um 23 prósent og Norwegian um 14 prósent.

Samkvæmt áætlunum félaganna fyrir næsta sumar er útlit fyrir að flugsætum til og frá Bandaríkjunum fækki um 29 prósent og til og frá Bretlandi um 22 prósent. Sætaframboð til og frá Þýskalandi eykst hins vegar um 10 prósent, til og frá Noregi og Sviss um 16 prósent og Kanada um 18 prósent. Helsta skýringin á minna framboði bandarískra flugsæta er fækkun áfangastaða í Bandaríkjunum og færri flugsæti til og frá Bretlandi geta skýrst af minna sætaframboði hjá bæði easyJet og British Airways í sumar.

Sætaframboð eykst á leiðum til og frá Kaupmannahöfn, eða um 9 prósent milli ára. Þá eykst framboðið um 16 prósent til og frá Ósló. Það dregst saman um 18 prósent til og frá JFK-flugvelli í New York og um 9 prósent til og frá París.