Hönnunarmerkið FÓLK Reykjavík hefur gert samning við þrjá nýja samstarfshönnuði, Rögnu Ragnarsdóttur og Studio Fléttu sem samanstendur af Birtu Rós Brynjólfsdóttur og Hrefnu Sigurðardóttur. Ný hönnun eftir þessa hönnuði og aðra samstarfshönnuði FÓLKs verður frumsýnd á HönnunarMars sem hefst þann 19. maí í nýju sýningarrými FÓLKs á Hafnartorgi. Þetta kemur fram í tilkynningu.

FÓLK Reykjavík er vaxandi íslenskt hönnunarmerki sem var stofnað árið 2017 sem útgefandi og vörumerki fyrir íslenska hönnun á heimsvísu. Fyrirtækið hefur undanfarin ár byggt upp framleiðsluþekkingu og sölu og markaðsinnviði alþjóðlega og er fyrirtækinu ætlað að vera stökkpallur fyrir íslenska hönnuði alþjóðlega. Vörur fyrirtækisins hafa verið sýndar á sýningum í Stokkhólmi og París og hefur FÓLK nýverið tryggt sér samninga við dreifingaraðila fyrir sex lönd og nú nýverið tók Finnish Design Shop ein stærsta vefverslun Norðurlandanna vörur FÓLKs í sölu.

Ragna Ragnarsdóttir

Ragna er íslenskur hönnuður, fædd í Reykjavík, lærð í París og starfrækir sitt eigið stúdíó í Reykjavík. Verk Rögnu samanstanda af smávöru, skúlptúrum og húsgögnum. Í verkum sínum kafar hún djúpt í framleiðsluferla og kannar möguleika á nýjungum sem leiða til einstakra og framandi vara. Með tilraunakenndri nálgun vinnur hún með efni sem oft eru óþekk öðrum. Með því að lita og laga efni á sérstakan hátt hefur Ragna skapað ákveðna fagurfræði sem er einkennandi fyrir hönnun hennar. Verk hennar eru frumleg og ævintýraleg en innblástur sinn sækir hún úr ólíkum áttum, allt frá náttúrulegu umhverfi sínu til kjarnorkuvopna og goðsagnakenndra vera, segir í tilkynningunni.

Ragna er íslenskur hönnuður, fædd í Reykjavík, lærð í París og starfrækir sitt eigið stúdíó í Reykjavík
Mynd/Aðsend

Studio Flétta

Birta Rós Brynjólfsdóttir útskrifaðist frá Listaháskóla Íslands með B.A. í vöruhönnun árið 2016. Meðfram námi stofnaði hún til verkefnisins Haugfé (2014) ásamt Auði Ákadóttur og Hrefnu Sigurðardóttur þar sem vakin er athygli á þeim verðmætum sem liggja í hráefnum sem falla til hjá framleiðslufyrirtækjum á Íslandi. Eftir útskrift fór hún í starfsnám hjá hönnunarteyminu Glithero í London. Birta er partur af Willow Project sem var sýnt á Dutch Design Week og á sýningunni Earth Matters í TextielMuseum í Tilburg, Hollandi. Fjallað er um verkefnið í bók Thames & Hudson, Radical Matter: Rethinking Materials for a Sustainable Future og í bókinni Why Materials Matter: Responsible Design for a Better World.

Hrefna Sigurðardóttir útskrifaðist frá Háskóla Íslands með B.S. í iðnaðarverkfræði árið 2013 og með B.A. í vöruhönnun frá Listaháskóla Íslands árið 2017. Áður hafði hún stundað nám í keramiki við Myndlistaskólann í Reykjavík. Meðfram námi stofnaði hún til verkefnisins Haugfé (2014) ásamt Auði Ákadóttur og Birtu Rós Brynjólfsdóttur þar sem vakin er athygli á þeim verðmætum sem liggja í hráefnum sem falla til hjá framleiðslufyrirtækjum á Íslandi. Hrefna var partur af teyminu á bakvið The Travelling Embassy of Rockall (2016), samfélagsverkefni þar sem skapaður var samræðuvettvangur um samfélag framtíðarinnar.

Saman eru þær hönnunartvíeykið Flétta þar sem endurnýting og uppvinnsla hráefna er megin-stefið. Flétta hlaut Hönnunarverðlaun The Reykjavík Grapevine fyrir vöru ársins árið 2019 og fyrir vörulínu ársins 2020.