Árið 2018 voru konur 33,5% stjórnarmanna í fyrirtækjum sem eru með 50 launþega eða fleiri. Þetta er í fyrsta sinn sem hlutfall þeirra mælist hærra en þriðjungur. Þetta kemur fram í tilkynningu á vef Hagstofunnar.

Til samanburðar var hlutfall kvenna í stjórnum stórra fyrirtækja einungis 12,7% árið 2007 en 9,5% árið 1999. Árið 2010 voru samþykkt lög um að hlutfall hvors kyns skyldi vera yfir 40% í stjórnum fyrirtækja með fleiri en 50 starfsmenn og tóku þau að fullu gildi í september 2013.

Hlutfall kvenna í stjórnum fyrirtækja sem eru með færri en 50 launþega stendur nánast í stað á milli ára, er 25,9%. Þá hækkar hlutfall kvenna í stöðu framkvæmdarstjóra lítillega milli ára, er nú 22,7%, og fylgir þannig eftir hægfara aukningu allt frá 1999.