Eftir 7,1 prósent efnahagssamdrátt árið 2020 batnaði íslenskur efnahagur talsvert á ný á árinu 2021 og útlit er fyrir áframhaldandi efnahagsbata. Spáð er 5,0 prósent hagvexti árið 2022 en talsvert hægari vexti í kjölfarið. Vöxturinn verður útflutningsdrifinn að stórum hluta þar sem ör fjölgun ferðamanna leikur lykilhlutverk ásamt auknu fiskeldi, myndarlegri loðnuveiði og auknum útflutningi hugverka.

Verðbólga mun reynast þrálát framan af spátímanum vegna áframhaldandi hækkunar á íbúðaverði, verðhækkana erlendis og hækkandi launakostnaðar innanlands svo nokkuð sé nefnt. Það kallar á aukið peningalegt aðhald og er útlit fyrir að stýrivextir verði á bilinu 5-6 prósent í árslok 2022 en lækki að nýju á seinni helmingi spátímans.

Helstu atriði:

  • Hagvöxtur – Spáð er 5,0 prósent hagvexti árið 2022, 2,7 prósent 2023 og 2,6 prósent 2024.
  • Utanríkisviðskipti – Viðskiptaafgangur verður 0,1 prósent af landsframleiðslu í ár og í námunda við 2 prósent 2023 og 2024.
  • Verðbólga – 7,6 prósent verðbólga að meðaltali árið 2022, 5,9 prósent 2023 og 3,9 prósent 2024.
  • Vinnumarkaður – 4,4 prósent meðaltalsatvinnuleysi í ár. 3,7 prósent 2023 og 3,6 prósent 2024.
  • Vextir – Stýrivextir fari yfir 5 prósent fyrir árslok. Verði í grennd við 4,5 prósent við lok spátímans.
  • Krónan - Krónan verði um 5 prósent sterkari við lok spátímans en í lok apríl 2022.