Þorsteinn Víglundsson, þingmaður Viðreisnar, hefur verið ráðinn forstjóri BM Vallár, samkvæmt heimildum Markaðarins. Búist er við því að tilkynnt verði um ráðningu Þorsteins síðar í dag.

Þorsteinn greindi frá því í fréttatilkynningu í morgun að hann hefði ákveðið að segja af sér þingmennsku frá og með 14. apríl næstkomandi. Hann hefði samþykkt að taka að sér verkefni á vettvangi atvinnulífsins og myndi hefja störf síðar í mánuðinum.

„Ég kveð með söknuði allt það góða fólk sem ég hef starfað með á Alþingi á undanförnum árum, bæði þingmenn og ekki síður allt hið hæfileikaríka starfsfólk sem starfar fyrir Alþingi,“ sagði í yfirlýsingu Þorsteins.

Þorsteinn er ekki ókunnugur iðnfyrirtækinu en BM Vallá var lengi vel í eigu eignarhaldsfélaga Víglundar Þorsteinssonar heitins, föður Þorsteins, og fjölskyldu. Starfaði Þorsteinn sem framkvæmdastjóri félagsins á árunum 2002 til 2010.

Þorsteinn hefur setið á þingi fyrir Viðreisn í fjögur ár. Hann var félags-og jafnréttismálaráðherra í ríkisstjórn Viðreisnar, Sjálfstæðisflokks og Bjartrar framtíðar árið 2017. Áður en hann settist inn á þing var hann framkvæmdastjóri Samtaka atvinnulífsins og þar áður Samtaka álframleiðenda.

BM Vallá er í eigu Eignarhaldsfélagsins Hornsteins sem er í meirihlutaeigu Heidelberg-samstæðunnar, eins stærsta sementsframleiðanda í heimi. Aðrir hluthafar eru hópur íslenskra fjárfesta og fyrirtækja sem tengjast hérlendum byggingariðnaði.

Uppfært klukkan 10:30:

Í tilkynningu frá Eignarhaldsfélaginu Hornsteini kemur fram að Þorsteinn hafi verið ráðinn forstjóri félagsins en Eignarhaldsfélagið Hornsteinn er móðurfélag BM Vallár, Björgunar og Sementsverksmiðjunnar. Hjá fyrirtækjunum starfa um tvö hundruð manns á starfsstöðvum víða um land.