Þorsteinn Víglundsson, forstjóri Eignarhaldsfélagsins Hornsteinn, er á meðal fjögurra annarra sem kjörin voru í nýja stjórn á hluthafafundi vísisjóðsins Iðunn. Aðrir í stjórninni eru Kristín Ingólfsdóttir, fyrrverandi rektor Háskóla Íslands, Margit Robertet stjórnarformaður, Adrienne Rivlin, doktor í geðlækningum og Guðjón G. Kárason, framkvæmdastjóri hjá Össuri. Þetta kemur fram á heimasíðu Kviku eignastýringar.

Sjö milljarða vísisjóður

Iðunn er framtakssjóður í rekstri Kviku eignastýringar sem leggur áherslu á fjárfestingar á sviði lífvísinda og heilsutækni (e. life science and health technology). Fyrirtæki sem falla þar undir starfa meðal annars við framleiðslu lækninga- og greiningatækja, lyfjaþróun, stafræna læknisþjónustu, heilbrigðisþjónustu auk stuðningsfyrirtækja í virðiskeðju eða þróun lífvísinda og heilbrigðistækni. Sjóðurinn er 6,7 milljarðar króna að stærð og fjárfestingartímabil hans er fimm ár. Hilmar Bragi Janusson er framkvæmdastjóri sjóðsins.

Fyrrverandi ráðherra

Þorsteinn Víglundsson er forstjóri Hornsteins en félagið rekur BM Vallá, Björgun og Sementsverksmiðjuna. Þorsteinn er fyrrum félags- og jafnréttismálaráðherra og þingmaður fyrir Viðreisn ásamt því að hafa gegnt starfi framkvæmdastjóra Samtaka atvinnulífsins. Hann starfaði áður sem forstjóri BM Vallár frá 2002 til 2010.

Fyrrverandi rektor Háskóla Íslands

Kristín Ingólfsdóttir er prófessor í lyfjafræði og fyrrverandi rektor Háskóla Íslands. Hún gegndi stöðu rektors í tíu ár en hafði áður starfað sem prófessor við Lyfjafræðideild Háskóla Íslands. Að loknu starfi rektors var Kristín gestaprófessor við Massachusetts Institution of Technology (MIT) í Boston. Kristín er formaður ráðgjafanefndar Landspítalans og situr einnig í alþjóðlegri vísindanefnd við Háskólann í Grenoble í Frakklandi.

Kristín Ingólfsdóttir, fyrrverandi rektor Háskóla Íslands.
Fréttablaðið/Stefán Karlsson

Forstöðumaður framtakssjóðasviðs

Margit Robertet er forstöðumaður framtakssjóðasviðs Kviku eignastýringar. Margit hefur reynslu af fjármálamörkuðum á Íslandi og í Evrópu þar sem hún starfaði framan af í fyrirtækjaráðgjöf, hjá Barclays í London og síðar Credit Suisse í París. Margit var framkvæmdastjóri lánasviðs Straums Burðaráss áður en hún tók þátt í stofnun Auðar Capital og kom að stofnun Auðar I slf., elsta starfandi framtakssjóðs á Íslandi. Margit situr í stjórn Íslandshótela, Securitas og Matorku og er formaður stjórnar IcelandSIF.

Sérfræðingur á sviði lífvísinda og heilbrigiðsmála

Adrienne Rivlin hefur starfað í fjölda ára sem sérfræðingur og ráðgjafi á sviði lífvísinda og heilbrigiðsmála m.a. hjá KPMG í London og nú LEK Consulting. Hún hefur aðstoðað fyrirtæki við stefnumótun, greiningu fyrir markaðssetningu og verðlagningu á lyfjum og lækningatækjum. Adrienne er með doktorspróf í geðlækningum frá Oxford háskóla.

Framkvæmdastjóri klíníkar hjá Össuri

Guðjón G. Kárason starfar sem framkvæmdastjóri klíníkar (e. clinics) hjá Össuri. Guðjón hefur starfað hjá Össuri frá árinu 1998 og unnið við vöruhönnun og þróun ásamt sölu- og markaðssetningu á vörum. Hann hefur víðtæka og alþjóðlega reynslu af kaupum og sameiningum fyrirtækja í heilbrigðisþjónustu ásamt því að hafa komið að fjölmörgum umbótaverkefnum innan fyrirtækja.