Hægt er að velja vægari úrræði en að setja heila bekki í skólum í sóttkví þegar upp koma smit. Þetta kemur fram í nýrri ályktun Samtaka atvinnulífsins sem birt var á heimasíðu samtakanna í dag. Þar segir að með núverandi ráðstöfunum um sóttkví muni næsti vetur fela í sér stórkostlegar takmarkanir á skólahaldi með tilheyrandi raski fyrir fólk, fjölskyldur og vinnustaði þeirra.

Taka dæmi frá nágrannalöndunum

Samtökin taka dæmi frá löndum í kringum okkur. Borgarar í Englandi og Norður-Írlandi sem teljast fullbólusettir gegn Covid-19 þurfa ekki lengur að fara í sóttkví ef þeir hafa komist í návígi við manneskju sem hefur sýkst af veirunni. Það sama á við um börn undir átján ára aldri. Í stað þess að fara í 10 daga sóttkví er þeim tilmælum beint til þeirra að taka PCR-próf, en þó er það ekki skylda. Þá er þeim ráðlagt að setja upp grímu þar sem ekki er hægt að tryggja fjarlægðarmörk og vera helst ekki í margmenni.

Í Danmörku sé meginreglan sú að loka ekki skóla eða dagvistun þrátt fyrir að upp komi smit, með fyrirvara um að á því megi gera undantekningar ef smitið er útbreitt.

Í Svíþjóð eru svo engar sérstakar reglur hvað skóla varðar heldur eru almenn tilmæli til fólks að fara varlega. Ef einstaklingur er útsettur fyrir smiti ber hann ábyrgð á því að vera vakandi yfir einkennum og ef kennari smitast er heilum deildum ekki lokað. Leikskólabörn eru ekki send í PCR-próf.

Í Noregi er reynt eftir fremsta megni að forða börnum yngri en 18 ára frá sóttkví. Fullbólusettir einstaklingar fara ekki í sóttkví, þrátt fyrir að vera útsettir fyrir smiti.

„Persónubundnar sóttvarnir og ábyrg hegðun í umgengni við veiruna munu nefnilega áfram reynast okkur farsælasta vopnið gegn Covid 19. Vísindin segja okkur að við munum þurfa að lifa með veirunni áfram. Ef ætlunin er ekki að lama hér skólastarf ítrekað í vetur, og þar með samfélagið í heild, þarf að breyta reglunum,“ segir í ályktun samtakanna. „Hægt er að velja vægari úrræði en sóttkví heilu og hálfu árganganna í senn. Hraðpróf hljóta að koma til álita eins og hjá öðrum þjóðum. Dæmin frá nágrannalöndum okkar sýna að það er fleiri en ein leið í boði.“