Rúmlega 90 prósent forsvarsmanna fyrirtækja telja að tekjur muni minnka milli annars ársfjórðungs í fyrra og sama fjórðungs í ár, vegna áhrifa COVID 19 á íslenskt atvinnulíf og nemur lækkunin að meðaltali 50%.

Þetta kemur fram í nýrri könnun Maskínu fyrir Samtök atvinnulífsins sem tók til 1.803 forsvarsmanna fyrirtækja sem eiga aðild að SA á tímabilinu 26. – 31. mars 2020. Svarhlutfall var 37%.

Forsvarsmenn fyrirtækjanna voru beðnir um mat þeirra á breytingu tekna fyrirtækjanna milli mars 2019 og mars 2020. Niðurstaðan er sú að 80 prósent telja að þær minnki, 15 prósent að þær standi í stað og 5 prósent að þær aukist. Minnkun tekna er að meðaltali áætluð 37 prósent en hjá þeim sem svara að hún minnki nemur samdrátturinn tæplega 50%.

Skert starfshlutfall algengasta niðurskurðaraðgerðin

Samkvæmt niðurstöðum gripu um 90 prósent af íslenskum atvinnurekendum til hagræðingaraðgerða vegna ástandsins og þar af var skert starfshlutfall starfsmanna algengasta aðgerðin. Þar á eftir kom niðurskurður annars rekstrarkostnaðar.

Uppsagnir voru tæplega sex þúsund vegna COVID-19 og var langstærstur hluti uppsagna í ferðaþjónustu og flutningum.

Heildarniðurstaðan var sú að áætlaður fjöldi uppsagna nam 2,6 prósent af starfsmannafjöldanum. Sú niðurstaða samsvarar 5.700 störfum.

„Um 24 þúsund eru komnir í skert starfshlutfall af sömu ástæðum. Sú tala er nokkuð lægri en fjöldi umsókna um hlutabætur hjá Vinnumálastofnun föstudaginn 3. apríl, en þær nema um 30 þúsund. Sá mismunur sýnir vel hversu hratt forsendur breytast frá degi til dags,“ segir á vef SA.

Um helmingur notenda hlutabótaúrræðisins starfa í flutningum og ferðaþjónustu, þar á eftir kemur verslun og önnur þjónusta.

Flestir telja að áhrifa COVID-19 gæti í þrjá til fjóra mánuði

Forsvarsmenn fyrirtækjanna voru spurðir um hversu lengi þeir teldu að áhrif COVID-19 muni vara á rekstur fyrirtækjanna. Flestir, eða 30 prósent, töldu áhrifin vara í þrjá til fjóra mánuði og fjórðungur taldi áhrifin standa í fimm til sjö mánuði. Svipað margir eða 29 prósent, töldu áhrifin vara lengur en tíu mánuði og að meðaltími áhrifanna er áætlaður 8 mánuðir.