Tekjur Alvotech, með Róbert Wessman í stafni, tvöfölduðust á milli ára og námu 64 milljónum Bandaríkjadala, jafnvirði 7,7 milljarða króna, á árinu 2020. Á sama tíma jókst tap félagsins fyrir skatta um 52 prósent og nam 213,2 milljónum Bandaríkjadala, jafnvirði 25,7 milljarða króna. Eftir skatta dróst tapið saman um 40 prósent og var 85,3 milljónir Bandríkjadala, jafnvirði 10,3 milljarða króna.

Við lok árs 2020 var eiginfjárhlutfallið 43 prósent og eigið fé 194 milljónir Bandaríkjadala, jafnvirði 23,4 milljarða króna. Þetta kemur fram í nýbirtum ársreikningi.

Sjö hliðstæðulíftæknilyf eru þróun hjá Alvotech, að því er fram kemur á heimasíðu fyrirtækisins. Hliðstæðulíftæknilyf eru í raun lyf, sambærileg öflugum líftæknilyfjum sem hafa verið á markaði í einhver ár. Hliðstæðulíftæknilyf eru framleidd í frumurækt og svo hreinsuð. Þau eru gefin sjúklingum með alvarlega sjúkdóma á borð við krabbamein og sjálfsónæmissjúkdóma eins og liðagigt og sóríasis.

Tryggir hundruð milljarða í tekjur á næstu árum

Fyrir um ári síðan fram í Markaðnum að Alvotech og alþjóðlegi lyfjarisinn Teva Pharmaceuticals hafi gert samstarfssamning um þróun, framleiðslu og markaðssetningu fimm líftæknilyfja í Bandaríkjunum. Samningurinn tryggi Alvotech tekjur upp á hundruð milljarða króna á næstu árum, að sögn Róberts Wessman, stofnanda fyrirtækisins, sem segir útlit fyrir að Alvotech ráði til sín 70 vísindamenn og sérfræðinga til viðbótar við þá 480 sem störfuðu þá hjá Alvotech.

Stefnir og Hvalur

Fram kom í Markaðnum í mars að tveir hlutabréfasjóðir í stýringu Stefnis, dótturfélags Arion banka, fjárfestu í Alvotech fyrir samanlagt um fimm milljónir Bandaríkjadala, jafnvirði rúmlega 600 milljóna króna, í hlutafjárútboði þar sem lyfjafyrirtækið sótti sér 35 milljónir dala í nýtt hlutafé.

Aðrir íslenskir fjárfestar sem komu að útboðinu, samkvæmt heimildum Markaðarins, voru meðal annars fjárfestingarfélagið Hvalur, sem er stýrt af Kristjáni Loftssyni, og Lífeyrissjóður Vestmannaeyja en auk þess lögðu nokkrir einkafjárfestar félaginu til fjármagn. Jöklar-Verðbréf höfðu umsjón með fjárfestingu Lífeyrissjóðs Vestmannaeyja, sem á helmingshlut í verðbréfafyrirtækinu.

Fjárfesting Stefnis nam um þriðjungi þeirrar heildarfjárhæðar sem íslenskir fjárfestar keyptu fyrir í útboðinu – 15 milljónum dala – en þetta var í fyrsta sinn sem innlendir fjárfestar, sem eru ekki hluti af stjórnendateymi lyfjafyrirtækisins, koma inn í hluthafahóp Alvotech. Það voru sjóðirnir ÍS 15, opinn hlutabréfasjóður, og ÍS 5, lokaður vogunarsjóður, sem stóðu að baki fjárfestingunni hjá Stefni.

Alvotech hafði þá samtals sótt um 100 milljónir dala í nýtt hlutafé á fjórum mánuðum.

Reksturinn tryggði fram að skráningu á markað

Með þeirri fjármögnuninni í mars, þar sem Alvotech var verðmetið á um 2,4 milljarða dala, er talið að búið sé að tryggja rekstur fyrirtækisins fram yfir áformað hlutafjárútboð og skráningu á markað erlendis síðar á árinu. Stefnt hefur verið að skráningu í kauphöll í Hong Kong en samhliða er einnig horft til þess möguleika að félagið fari á markað í bandarísku kauphöllinni Nasdaq. Alþjóðlegu fjárfestingarbankarnir Morgan Stanley, Goldman Sachs og HSBC verða ráðgjafar félagsins við skráningarferlið.

Alvotech er í meirihlutaeigu Aztiq Pharma, sem Róbert fer fyrir, og þá er Alvogen stór hluthafi, en þar eru fyrir einir stærstu fjárfestingarsjóðir í heiminum í dag, CVC Capital Management og Temasek, sem er fjárfestingarsjóður í Singapúr. Aðrir hluthafar eru meðal annars alþjóðlegi fjárfestingarsjóðurinn Yas Holding og japanska lyfjafyrirtækið Fuji Pharma.