Bain Capital sem er við það að eignast 16,6 prósenta hlut í Icelandair, að því gefnu að hluthafafundur samþykki hlutafjáraukningu upp á 8,1 milljarð króna, hyggst tefla fram Matthew Evans í stjórn félagsins á sama tíma og Úlfar Steindórsson, stjórnarformaður flugfélagsins, mun víkja sæti. Þetta kemur fram í tilkynningu til Kauphallarinnar.

Evans er framkvæmdastjóri yfir greiningu atvinnuvega hjá Bain Capital Credit og fer í starfi sínu meðal annars fyrir fjárfestingum í flugi. Hann situr í stjórnum nokkra félaga sem skráð eru á hlutabréfamarkað og sjóðir á vegum Bain Capital hafa fjárfest í. Hann hefur starfað hjá Bain Capital frá árinu 2009.

Evans situr í stjórnum nokkra skráðra félaga í Kauphöll fyrir hönd Bain Capital.
Mynd/Bain Capital

Úlfar, sem er forstjóri Toyota á Íslandi, er sá stjórnarmaður Icelandair Group sem hefur setið hvað lengst eða í ellefu ár.

Bain Capital, sem er með 1.200 starfsmenn, er með um 130 milljarða Bandaríkjadala í stýringu fyrir fjárfesta. Fram hefur komið í tilkynningu til Kauphallarinnar að Bain Capital eigi fjölbreytt eignasafn í flugtengdum rekstri. Fram kom í fjölmiðlum að keypti Bain Capital til að mynda Virgin Australia sumarið 2020 en það var komið var að fótum fram vegna COVID-19 heimsfaraldursins.

Upplýst var í síðustu viku að Bain Capital myndi auka hlutafé Icelandair á genginu 1,43, að því gefnu að hluthafafundur myndi samþykkja viðskiptin. Frá því að tilkynnt var um viðskiptin hafa hlutabréf flugfélagsins hækkað um 16 prósent.

Margir fjárfestar og sérfræðingar á markaði voru meðvitaðir um að Icelandair myndi að öllum líkindum auka hlutaféð um þessar mundi enda hefur flugfélagið gengið á lausafé sitt að undanförnu í ljósi þess að reksturinn hefur legið meira og minna niðri vegna COVID-heimsfaraldursins en það krefst lausafjár að koma flugrekstri aftur af stað.

Icelandair sótti sér aukið hlutafé fyrir níu mánuðum til að mæta þeim áskorunum sem fylgja því að reksturinn myndi liggja meira og minna niðri um nokkurt skeið. Athygli vekur að verðið sem Bain mun kaupa hlutaféð á er 43 prósent yfir útboðsgenginu fyrir níu mánuðum.

Úlfar Steindórsson, forstjóri Toyota á Íslandi, hefur setið stjórn Icelandair Group í ellefu ár.

Aðdragandi þess að Bain Capital samdi um að leggja Icelandair til aukið hlutafé var að flugfélagið tók ákvörðum í byrjun árs um að tveimur Boeing 767- þotum í fraktvélar. „Þá var farið að leita að aðilum sem myndu annars vegar kaupa vélarnar og hins vegar fjármagna breytingarnar og við myndum leigja þær til baka. Bain Capital kemur að því og þá þurftu þeir að skoða mjög vel þann aðila sem verið er að semja við. Það var upp úr því sem þeir nálguðust okkur og veltu fyrir sér möguleikanum á því að geta orðið hluthafar í félaginu,“ sagði Úlfar í samtali við Morgunblaðið hinn 25. júní.

Bain Capital á rætur að rekja til ráðgjafafyrirtækisins Bain & Co. sem er á meðal þekktustu ráðgjafafyrirtækja í heimi og er oft nefnt í sömu andrá og McKinsey og Boston Consulting Group.

Raunar var Bain & Co. stofnað af fyrrverandi meðeiganda Boston Consulting Group árið 1973 í því skyni að keppa við sinn gamla vinnustað. Fyrirtækið byggði á þeim tíma á þeirri sérstöðu að veiti ekki eingöngu ráðgjöf heldur aðstoðaði viðskiptavini við að koma henni til framkvæmda.

Árið 1984 stofnuðu meðeigendur Bain & Co. fjárfestingafélagið Bain Capital. Á meðal stofnenda var Mitt Romney , sem gerði tvær tilraunir til að verða forseti Bandaríkjanna, og stýrði hann félaginu um árabil. Romney seldi hlut sinn í Bain Capital um aldamótin.

Hugmyndin að Bain Capital var að fjárfesta í fyrirtækjum og nýta þekkingu starfsmanna Bain & Co. til að bæta rekstur þeirra. Bain Capital fjárfesti fyrst einvörðungu í óskráðum fyrirtækjum en frá árinu 1996 hefur það einnig fjárfest í fyrirtækjum sem skráð eru á markað. Bain Capital festir einnig kaup á skuldabréfum. Bain Capital Credit sá til að mynda tækifæri í því að kaupa portúgölsk og spænsk vandræðalán á árinu 2017.

Fram kom í tilkynningu til Kauphallarinnar í mars að Titan Aircraft Investments, sem sé samstarfsverkefni Bain Capital Credit og Titan Aviation Holdings, hafi keypt tvær Boeing 767 þotur af Icelandair í mars og leigi þær íslenska félaginu aftur til tíu ára. Breyta á farþegavélunum í fraktflugvélar vorið 2022, eins og Úlfar vísaði til fyrr í fréttinni.