Bandaríski vogunarsjóðurinn Taconic Capital hefur aukið við hlut sinn í Arion banka um helming og er nú langsamlega stærsti hluthafi bankans með rúmlega 23,5 prósenta hlut. Miðað við gengi hlutabréfa Arion banka í dag er sá hlutur metinn á liðlega 33 milljarða króna.

Þetta kemur fram í flöggunartilkynningu til Kauphallarinnar rétt í þessu en sjóðir í stýringu Taconic bættu við sig rúmlega 7,5 prósenta hlut í bankanum þegar gengið var frá sölu á öllum tuttugu prósenta hlut Kaupþings í Arion banka fyrr í þessari viku.

Í gær var greint frá því að breski vogunarsjóðurinn Landsdowne hefði aukið við hlut sinn í Arion banka um tæplega eitt prósent og fer sjóðurinn með um fimm prósenta hlut í bankanum.


Kaupþing seldi allan hlut sinn í Arion banka, eins og Markaðurinn hafði áður upplýst um, fyrir samtals 27,4 milljarða króna. Tæplega tíu milljarðar króna af söluandvirðinu fellur í skaut ríkissjóðs á grundvelli afkomuskiptasamnings sem var á meðal þeirra stöðugleikaskilyrða sem Kaupþing þurfti að undirgangast við samþykkt nauðasamninga í árslok 2015.

Gengið var frá bindandi samkomulagi við hóp fjárfesta um kaupinn þann 1. júlí síðastliðinn með þeim fyrirvara að ríkið myndi ekki að stíga inn í viðskiptin og nýta sér forkaupsrétt sinn.