Sýn hf. hefur gert samning um kaup á öllu hlutafé Eignarhaldsfélagsins Njálu ehf., móðurfélags Já hf. Þetta kemur fram í tilkynningu.
Samkvæmt kaupsamningi mun Já jafnframt selja rekstur Gallup á Íslandi til þriðja aðila fyrir afhendingu hins selda. Viðskiptin eru jafnframt gerð með fyrirvara um samþykki Samkeppniseftirlitsins.
„Með kaupum okkar á Já hefst vegferð þar sem við viljum byggja ofan á þá styrkleika sem Já er þekkt fyrir,“ segir Yngvi Halldórsson, forstjóri Sýnar. „Já er rótgróið vörumerki og ja.is er einn af tíu mest heimsóttu vefjum Íslands.“
„Þangað leita einstaklingar til að finna upplýsingar um fólk, fyrirtæki og vörur. Miklir möguleikar eru í auknu þjónustuframboði byggt á öflugum kerfum félagsins og sterkum mannauð sem við erum mjög spennt að fá til liðs við okkur.“
Vilborg Helga Harðardóttir, forstjóri Já, kveðst spennt yfir því að ganga til liðs við Sýn. „Við erum spennt fyrir því að ganga til liðs við Sýn og sjáum þar mikil tækifæri fyrir Já, sem part af þeirri flóru sem þar er fyrir. Á sama tíma fylgir því tregi að segja skilið við góða félaga hjá Gallup og óskum við þeim alls hins besta á sinni vegferð.“
