Sýn hefur náð samkomulagi við erlenda fjárfesta um einkaviðræður og helstu skilmála í tengslum við mögulega sölu og endurleigu (e. sale and leaseback) á óvirkum farsímainnviðum félagsins. Miðað við þá skilmála sem nú liggja fyrir myndu viðskiptin styrka efnahagsreikning félagsins og gæti væntur söluhagnaður Sýnar numið yfir sex milljörðum króna, gangi viðskiptin eftir.

Þetta kemur fram í tilkynningu félagsins til Kauphallarinnar í morgun en þar segir ráðgert sé að gerður verði langtímaleigusamningur til 20 ára, sem tryggja mun áframhaldandi aðgang félagsins að hinum óvirku farsímainnviðum.

Allur virkur farsímabúnaður verður áfram í eigu Sýnar. Fjárhæðir og reikningshaldslega meðferð viðskiptanna mun ráðast af endanlegum samningum.

Í samkomulaginu felst engin skuldbinding eða trygging um að af viðskiptunum verði, en þau eru meðal annars háð áreiðanleikakönnun og eftir atvikum aðkomu eftirlitsstofnana. Er því enn allmikil óvissa um hvort og hvenær viðskiptin komist á, að því er segir í tilkynningunni.

Hlutabréfaverð Sýnar hefur hækkað um liðlega 47 prósent á undanförnum þremur mánuðum og nemur markaðsvirði félagsins í dag rúmlega 10 milljörðum króna.