Sýn hagnaðist um 670 milljónir króna á fyrsta fjórðungi ársins samanborið við 56 milljónir króna á sama fjórðungi í fyrra. Forstjóri félagsins segir að félagið muni klára stefnumótun með nýrri framkvæmdastjórn og skerpa á rekstrinum strax í júní.

Tekjur á fyrsta ársfjórðungi námu 4.975 milljónum króna og lækkuðu um 1 prósent á milli ára. EBITDA hagnaður nam 1.260 milljónum og jókst um 5 prósent. Heildarfjárfestingar félagsins námu 1.034 milljónum og þar af námu rekstrarfjárfestingar 616 milljónum. Fyrirliggjandi EBITDA horfur eru óbreyttar á bilinu 6,0-6,5 milljarðar króna og heildarfjárfestingar á bilinu 3,8-4,2 milljarðar.

Í tilkynningu um uppgjörið kemur fram að söluhagnaður Sýnar af samruna dótturfélagsins P/F Hey í Færeyjum og Nema hafi numið 817 milljónum króna. 49,9 prósenta hlutur Sýnar í nýju sameinuðu félagi er færður samkvæmt hlutdeildaraðferð og því ekki hluti af samstæðureikningsskilum Sýnar frá byrjun þessa árs.

Haft er eftir Heiðari Guðjónssyni, forstjóra Sýnar, að framkvæmdastjórn félagsins hafi gjörbreyst á árinu. Ný framkvæmdastjórn verði fullmönnuð við lok þessa mánaðar þar sem fjórir framkvæmdastjórar af fimm eru nýir.

„Þeir sem koma núna inn í framkvæmdastjórn hafa unnið áður sem ráðgjafar fyrir félagið og þekkja það vel sem gerir það að verkum að þeir þurfa ekki tíma til aðlögunar. Ég tel félagið einstaklega heppið með samsetningu hinnar nýju framkvæmdastjórnar og hlakka til að taka slaginn á markaði með þessum úrvalshópi. Félagið mun klára stefnumótun og skerpa á rekstrinum strax í júní. Við ætlum að veita viðskiptavinum okkur úrvals þjónustu og vera í fararbroddi með nýjungar, Vegna árstíðarsveiflu í rekstri verða næstu fjórðungar ársins betri. Við erum enn vissari um að horfur ársins náist og horfum björtum augum fram á við,“ segir Heiðar.