Fyrirætlanir eru um að byggja við Strandgötu 9, sem nú hýsir kaffihúsið Súfistann, og breyta jarðhæð húsnæðisins í mathöll. Viðbyggingin verður vestan og norðan við núverandi hús. Þá er gert ráð fyrir að níu smáíbúðir verði skipulagðar í viðbyggingunni.

Fyrirspurn þessa efnis var lögð fyrir skipulags- og byggingarráð Hafnarfjarðarbæjar í vikunni og var tekið jákvætt í erindið. Hugmyndin er ekki ný af nálinni en lengi hefur legið fyrir leyfi til þess að byggja við húsið. Í nýju hugmyndinni er þó gert ráð fyrir að byggingamagnið aukist og að íbúðirnar verði níu talsins í stað þriggja áður.

Á jarðhæð viðbyggingarinnar og í því rými sem nú hýsir Súfistann er ráðgert að skipuleggja litla mathöll með fjórum til fimm veitingastöðum og sameiginlegu rými fyrir 80 gesti. Á annarri hæð nýbyggingarinnar verði síðan fimm íbúðir á bilinu 33-50 fermetrar og á þriðju hæð hússins verði fjórar 33 fermetra íbúðir. Í kjallara nýbyggingarinnar verði meðal annars vinnuaðstaða fyrir mathöllina, kælar, lager og starfsmannaaðstaða.

Í fyrirspurninni kemur fram að þegar hafi nokkrir veitingastaðir sem getið hafi sér gott orð, bæði í Hafnarfirði og utan bæjarins, lýst yfir áhuga á verkefninu og að hugmyndin sé að bjóða upp á svipaða blöndu veitingastaða og er í Mathöllinni á Hlemmi.