Peningastefnunefnd Seðlabankans hefur ákveðið að hækka stýrivexti um 0,75 prósentustig. Stýrivextir bankans verða því 2,75 prósent. Þetta kemur fram í yfirlýsingu peningastefnunefndar sem birt var fyrir skömmu. Hækkunin er í takt við spár greiningaraðila. Í yfirlýsingunni kemur fram að verðbólguhorfur hafi versnað töluvert frá síðasta fundi nefndarinnar en hún mældist 5,7 prósent í janúar.

„Undirliggjandi verðbólga hefur einnig aukist og er talin vera ríflega 4%. Þá hafa verðbólguvæntingar á suma mælikvarða hækkað. Hækkun húsnæðisverðs vegur þungt en aðrir innlendir kostnaðarliðir hafa einnig hækkað. Við bætist hækkun alþjóðlegs olíu- og hrávöruverðs," segir í yfirlýsingunni.

Jafnframt kemur fram að samkvæmt spá Seðlabankans séu horfur á að verðbólga verði 5,8 prósent á fyrsta fjórðungi ársins og yfir 5 prósent fram eftir þessu ári. Þá er gert ráð fyrir að verðbólga hjaðni þegar hægir á verðhækkun húsnæðis og alþjóðlegar verðhækkanir fjara út en hún verði ekki komin að markmiði fyrr en undir lok spátímans.

Samkvæmt nýrri þjóðhagsspá Seðlabankans sem birt er í febrúarhefti peningamála var hagvöxtur um 1 prósent meiri á síðasta ári en spáð var í nóvember eða 4,9 prósent. Seðlabankinn spáir svipuðum hagvexti í ár.

„Störfum hefur haldið áfram að fjölga og atvinnuleysi að minnka og er áætlað að framleiðsluslakinn sem myndaðist í kjölfar COVID-19-farsóttarinnar sé horfinn. Óvissa er hins vegar enn mikil," segir í yfirlýsingunni.

Næsta vaxttaákvörðun Seðlabankans verður þann 4. maí næstkomandi.