Meginhlutverk Stórkaups verður, eins og nafnið bendir til, þjónusta við stórnotendur, t.d. framleiðendur, rekstraraðila og veitingageirann, þar sem áhersla verður lögð á hátt þjónustustig og nútímavætt sölukerfi, sem byggir á vefsölu og öflugu þjónustuveri.

Hið nýja félag mun nýta sterka innviði Haga þegar kemur að innkaupum- og vöruhúsarekstri og er gert ráð fyrir að ´með tímanum verði vöruúrval sem breiðast. Stórkaup tekur þannig að nokkru leyti við hlutverki Rekstrarlands, sem í dag er hluti af Olís.

Samhliða opnun Stórkaups er unnið að aðlögun á útibúaneti Olís á landsbyggðinni og á næstu mánuðum verður verslunum breytt í afgreiðslulagera og söluskrifstofur. Þetta er gert til að efla nærþjónustu Olís um allt land og bæta þjónustu í þeim vöruflokkum sem eftir standa.

„Með tilfærslu verkefna Olís innan samstæðu Haga hefur skapast grundvöllur fyrir rekstrareiningu sem sinnir stórnotendum umfram það sem við höfum hingað til gert og nýtum til þess styrkleika félagsins, einkum á sviði innkaupa og í starfsemi vöruhúsa. Stórkaup er ætlað það hlutverk að þjóna stórnotendum um aðföng á breiðum grunni þar sem leiðarljósin verða hagkvæmni, nútímalegt þjónustustig og einfalt skipulag sölu og dreifingar.

Það er sérlega ánægjulegt að góður hópur starfsfólks sem starfað hefur fyrir Olís hefur fengið ný hlutverk hjá Stórkaup, en Árni Ingvarsson hefur verið ráðinn til að leiða félagið til framtíðar. Viðskiptavinir Stórkaups munu njóta þekkingar og reynslu þessa öflugu hóps í skemmtilegu uppbyggingarstarfi sem er fram undan.“ segir Finnur Oddsson, forstjóri Haga hf.

„Á undanförnum misserum hefur Olís tekið mikilvæg skref sem miða að því að efla hagkvæmni í rekstri og skerpa á fókus starfseminnar. Endurskipulagning á vöruframboði og þjónustufyrirkomulagi á fyrirtækjasviði er mikilvægur liður í þessum aðgerðum. Þeir vöruflokkar sem koma til með að flytjast yfir til Stórkaup eru safn gæðavörumerkja sem viðskiptavinir okkar hafa verið mjög ánægðir með. Á sama tíma gera þessar aðgerðir okkur hjá Olís kleift að sníða sölu- og dreifikerfi okkar betur að þeim vöruflokkum sem eftir standa og skerpa fókus enn frekar á okkar kjarnarekstur.“ segir Frosti Ólafsson framkvæmdastjóri Olís.