Stoðir, eitt stærsta fjárfestingafélag landsins, skiluðu um 2,44 milljarða króna hagnaði á þriðja fjórðungi þessa árs. Það er sambærileg afkoma og á öðrum ársfjórðungi þegar félagið hagnaðist um 2,55 milljarða.

Þetta kemur fram í afkomuyfirliti sem var sent til hluthafa í gær og Markaðurinn hefur undir höndum. Fyrir fyrstu níu mánuði ársins nemur hagnaður Stoða tæplega tveimur milljörðum króna en í lok september var bókfært eigið fé félagsins um 27,1 milljarður króna.

Fjárfestingaeignir Stoða, sem er stór hluthafi í Símanum, TM og Arion banka, voru metnar á 23,5 milljarða og þá átti félagið um 3,6 milljarða í reiðufé.

Stærstu hluthafar Stoða eru meðal annars félög á vegum Jóns Sigurðssonar, stjórnarformanns Stoða, Einars Arnar Ólafssonar, fyrrverandi forstjóra Skeljungs, og Örvars Kjærnested, stjórnarmanns TM