Valdimar Svavarsson, stjórnarformaður VÍS, segir að úrsagnir tveggja stjórnarmanna í VÍS hafi eingöngu snúist um deilur um verkaskiptingu.

Sjá einnig: Helga Hlín og Jón segja sig úr stjórn VÍS

Eins og greint var frá hafa Helga Hlín Hákonardóttir og Jón Sigurðsson sagt sig úr stjórn VÍS. Sögðu þau „stjórnarhættir innan stjórnar hafa leitt af sér trúnaðarbrests“ og um leið efa þeirra um að umboðsskyldu stjórnarmanna væri gætt í ákvarðanatöku. 

Í tilkynningu frá Valdimari segir hann rétt að ítreka að ekki hafi verið um að ræða deilur um stefnu, rekstur eða meiriháttar ákvarðanir heldur eingöngu um verkaskiptingu innan stjórnar.

„Í byrjun sumars steig Svanhildur Nanna Vigfúsdóttir, formaður stjórnar, tímabundið til hliðar vegna persónulegra mála og tók Helga Hlín Hákonardóttir, varaformaður tímabundið við sem formaður. Eftir umræður stjórnar í dag varð ljóst að Svanhildur hugðist ekki stíga aftur inn sem formaður og því þótti rétt að stjórn skipti með sér verkum að nýju,“ segir Valdimar.

„Skiptar skoðanir voru um þetta  á meðal stjórnarmanna en niðurstaða meirihluta stjórnar var kjósa formann og varaformann að nýju. Það eru mikil vonbrigði að Helga Hlín Hákonardóttir og Jón Sigurðsson skyldu ákveða að segja sig úr stjórn vegna þessa og harma ég það mjög.“

Þá segir Valdimar að í mikilli sátt innan stjórnar hafi verið unnið að miklum og góðum breytingum innan VÍS sem hafi skilaði félaginu sem betri fjárfestingakosti. Áhersla á grunnrekstur félagsins hafi verið aukin og hafa þessar breytingar skilað sér í betri rekstri og sterkara félagi.

„Þetta endurspeglast í þeim afkomutölum sem kynntar voru fyrir 3ja ársfjórðung í gær. Þeirri vegferð er enganveginn lokið og munum við halda áfram að gera gott félag enn betra.“