Stjórn HB Granda ákvað á fundi í dag að leggja til við hluthafafund að breyta nafni og vörumerki félagsins í Brim og Brim Seafood. Þá hefur stjórnin einnig samþykkt samninga um kaup á sölufélögum í Asíu og að leggja þá fyrir hluthafafund til samþykktar.

Þetta kemur fram í tilkynngu HB Granda til Kauphallarinnar en þar segir að nýtt vörumerki og nafn þjóni vel tilgangi félagsins sem er að markaðssetja og selja afurðir, sem félagið veiðir og vinnur, á verðmætum alþjóðamörkuðum.

Nafni félagsins var síðast breytt fyrir 15 árum og vísaði þá til sameiningar tveggja félaga, Haraldar Böðvarssonar og Granda, sem áður varð til við sameiningu Ísbjarnarins og Bæjarútgerðar Reykjavíkur. Breytingarnar að þessu sinni eru sagðar undirstrika aukna áherslu félagsins á markaðs- og sölumál sem birtist m.a. í kaupum á sölufélögunum í Asíu.

„Brim kom fyrst til sögunnar árið 2003 sem sjávarútvegsfélag Eimskipafélagsins og átti þá Harald Böðvarsson, Skagstrending og Útgerðarfélag Akureyrar. Við sameiningu Útgerðarfélags Akureyrar, sem var þá komið í eigu Útgerðarfélagsins Tjalds, við ÚT ári síðar varð Brim nafnið á sameinaðu félagi. Á síðasta ári var nafni Brims breytt í Útgerðarfélag Reykjavíkur sem hefur nú afhent HB Granda nafnið Brim til eignar og afnota,“ segir í tilkynningunni.

„Brim er einfalt og þjált nafn sem er ásamt vörumerkinu Brim Seafood þekkt á alþjóðamörkuðum fyrir sjávarafurðir. Vörumerkið myndar þrjár öldur. Öldurnar tákna annars vegar brim, sem brýtur nýja leið í viðskiptum, og hins vegar mynda þær fisk, sem er tákn fyrir afurðir fyrirtækisins. Blái liturinn stendur fyrir lit sjávarins og silfrið táknar þau verðmæti sem Brim skapar.“

Undir lok síðasta árs greindi Guðmundur Kristjánsson, forstjóri HB Granda, frá því í opnuviðtali við Markaðinn að hann vildi vilja leggja fram tillögu við stjórn útgerðarfélagsins á þessu ári um að nafni þess yrði breytt í Brim.

HB Grandi gerði kauptilboð í áðurnefnd asísk sölufélög að fjárhæð 31,1 milljón evra síðastliðinn föstudag og gekk eigandi þeirra, Útgerðarfélag Reykjavíkur hf., að tilboðinu eins og greint var frá í tilkynningu til kauphallar. Tilgangur kaupanna er að styrkja sölu- og markaðsstarf félagsins á alþjóðamörkuðum, einkum í Asíu.