Stjórn Festar, sem rekur meðal N1 og Krónuna, hefur ákveðið að endurskoða starfsreglur sínar. Þetta kemur fram í tilkynningu til Kauphallarinnar.

Í síðustu viku birtist viðtal við Vítalíu Laz­areva í hlað­varp­inu Eigin konur þar sem hún rakti meint kyn­ferð­is­of­beldi sem hún sagði að Þórður Már Jóhannesson, fyrrverandi stjórnarformaður Festar, Ari Edwald og Hreggviður Jónsson hefðu beitt sig.

Þórður Már sagði sig úr stjórn Festar fyrir viku.

Stjórn Festar segir að það hafi veri þungbært að heyra um reynslu Vítalía. Umrætt mál hafi litið mjög alvarlegum augum af stjórninni frá því hún heyrði af því fyrst og var það tekið til skoðunar á vettvangi hennar í samræmi við þau lög, samþykktir og reglur sem henni ber að starfa eftir. „Frá upphafi var ljóst að innan þessa ramma hafði stjórn lítið rými til að bregðast við. Þegar málið varð opinbert með afgerandi hætti með áðurnefndu viðtali í byrjun janúar sagði fyrrverandi stjórnarformaður af sér,“ segir í tilkynningunni.

Markmið endurskoðunnar á starfsreglum stjórnar er að gera vinnulag skýrara ef fram koma upplýsingar sem benda til mögulegs vanhæfis stjórnarmanna og hefur stjórn ákveðið að hefja þá vinnu strax. „Festi er með skýrar reglur fyrir alla stjórnendur og starfsmenn félagsins og dótturfélaga sem verða lagðar til grundvallar við endurskoðun á starfsreglum stjórnar. Það er markmið og vilji stjórnar Festi að vera ætíð til fyrirmyndar um góða stjórnarhætti og mun niðurstaða endurskoðunar á starfsreglum stjórnar verða kynntar á aðalfundi 22. mars,“ segir í tilkynningunni.

Stjórn Festar fordæmir allt ofbeldi og telur mikilvægt að hlustað sé á þolendur. Hún segir að það sé skylda okkar að breytast með samfélaginu og í sameiningu eigum við að búa til öruggara umhverfi fyrir okkur öll.

„Skýr skilaboð hafa komið frá samfélaginu um að fyrirtæki sem tengjast slíkum málum bregðist fyrr við og taki á málum með skýrari og ákveðnari hætt,“ segir í tilkynningunni.