Stekkur fjárfestingarfélag ehf. hefur keypt 35 prósent hlut í Límtré Vírneti. Fyrir átti Stekkur 45% hlut í félaginu og nemur eignarhlutur Stekks því 80% eftir viðskiptin. Seljandi er Bingo ehf. sem með sölunni hefur selt alla hluti sína í félaginu. Kaupin eru háð samþykki Samkeppniseftirlitsins. Fyrirtækjaráðgjöf Arion banka var ráðgjafi í viðskiptunum.

Límtré Vírnet er íslenskt iðnfyrirtæki sem framleiðir og selur vörur fyrir íslenskan byggingariðnað. Fyrirtækið er leiðandi á Íslandi í framleiðslu á stál- og álklæðningum, límtré og yleiningum úr íslenskri steinull. Starfsemin er rekin á þremur stöðum á landinu. Höfuðstöðvar eru í Reykjavík en framleiðslu- og sölustöðvar í Borgarnesi og á Flúðum.

„Við höfum óbilandi trú á fyrirtækinu sem hefur náð góðum árangri á undanförnum árum. Það eru spennandi tímar framundan og teljum við að eftirspurn eftir umhverfisvænni íslenskri framleiðslu Límtré Vírnets muni halda áfram að vaxa. Reynsla viðskiptavina okkar er góð og sífellt fleiri velja okkar íslenska byggingarefni, enda gæðin óumdeild og þjónustan til fyrirmyndar. Við hlökkum mikið til að stýra félaginu inn í framtíðina, halda áfram að þróa nýjar lausnir og vaxa á því framkvæmdaskeiði sem er framundan,“ segir Guðlaug Kristbjörg Kristinsdóttir, framkvæmdarstjóri Stekks og stjórnarformaður Límtré Vírnets.

„Við höfum verið hluthafar í Límtré Vírneti í rúm 11 ár og allt hefur sinn tíma. Hugur okkar hjóna stendur nú til þess að einbeita okkur að færri kjarnaverkefnum. Þetta hefur verið stórskemmtilegt verkefni þar sem fyrstu árin fóru í að ná utan um rekstur félagsins en síðan tók við stöðug uppbygging með breiðara vöruframboði sem leitt hefur til aukinnar veltu og bættrar afkomu. Fyrirtækið stendur vel, með frábæran hóp starfsmanna og stjórnenda, sterkan hluthafahóp og er í kjörstöðu til að nýta fjölbreytt tækifæri til sóknar. Ég vil þakka stjórnendum, starfsfólki og stjórn félagsins fyrir einstaklega ánægjulegt samstarf á síðastliðnum 11 árum og óska fyrirtækinu og hluthöfum þess velfarnaðar í frekari þróun Límtré Vírnets,” segir Hjörleifur Jakobsson, eigandi og stjórnarformaður Bingo ehf.