Heildar greiðslukortavelta hérlendis í nóvember nam rúmum 108,7 milljörðum króna og jókst um 20,7 prósent á milli ára miðað við breytilegt verðlag. 12,6 prósent af allri greiðslukortaveltu í verslun fór í gegnum netið í nóvember síðastliðinn en það hlutfall var að meðaltali 7,3 prósent aðra mánuði ársins í ár.
Hlutfall netverslunar af heildarveltu í verslun hefur aukist hratt undanfarin ár en árið 2017 var það einungis 2,2 prósent, að meðaltali, á mánuði.
Í tilkynningu frá Rannsóknarsetri verslunar kemur fram að gögn þeirra sýni ótvírætt að nóvember er netverslunar mánuður ársins. Frá árinu 2017 hefur nóvember verið stærsti mánuður ársins í innlendri netverslun en gögn RSV ná aftur til marsmánaðar það árið. Með tilkomu hinna þekktu afsláttardaga nóvembermánaðar hefur kortavelta á netinu í nóvember aukist til muna en er þá átt við dag einhleypra, svartan föstudag og stafrænan mánudag.
Alger sprenging varð í netverslun í nóvember árið 2020 og 112,5 prósent aukning var í netverslun á milli október- og nóvembermánaðar í fyrra. Í ár tvöfaldaðist veltan næstum því, en 97 prósent aukning var í netverslun á milli október- og nóvembermánaðar þetta árið.
Mest var aukningin í ár í gjafa- og minjagripaverslunum eða alls 239 prósent, raf- og heimilistækjaverslunum eða 225 prósent og fataverslunum alls 146 prósent.
Í tilkynningu kemur þó einnig fram að samdráttur hafi verið í netverslun á milli ára en greiðslukortavelta í verslun á netinu var 0,1 prósent minni í nóvember síðastliðnum en hún var í sama mánuði í fyrra miðað við breytilegt verðlag.
Myndin hér fyrir neðan sýnir ársbreytingu greiðslukortaveltu í netverslun og framlag tegunda verslana til breytingarinnar.
Samdráttur á milli ára var mestur í gjafa- og minjagripaverslunum (-51,8%), lyfja-, heilsu- og snyrtivöruverslunum (-21,2%) og fataverslunum (-16%). Aukning varð á milli ára í netverslun bóka, blaða og hljómplötuverslana, um 8,4%, miðað við breytilegt verðlag. Þá jókst önnur verslun á netinu um 16,7%.
