Frasers Group plc tilkynnti í dag að fyrirtækið muni fjölga verslunum sínum á Íslandi með opnun nýrrar Sports Direct íþróttavöruverslunar í verslunarkjarnanum Norðurtorgi á Akureyri. Frasers Group plc hefur einnig framlengt leigusamning varðandi núverandi verslun Sports Direct í Skógarlind í Kópavogi og hefur áform um endurbætur á versluninni sem færa munu viðskiptavinum betri verslunarupplifun. Þetta kemur fram í tilkynningu.

Verslun SportsDirect hefur verið til húsa í verslunarhúsnæðinu við Skógarlind 2 undanfarin tíu ár og nú hefur fyrirtækið endurnýjað leigusamning sinn við Festi hf. til tíu ára. Í Skógarlind leigir fyrirtækið ríflega 2.700 fermetra stórt rými undir starfsemi sína.

Stefnt er að opnun nýju verslunarinnar á Akureyri í sumar og þar mun Sports Direct bjóða vörur frá framleiðendum á borð við Nike, Adidas, Under Armour, ASICS og Puma. Í versluninni verður einnig að finna USC sem býður tískuþenkjandi viðskiptavinum úrval gæðafatnaðar. Verslunin verður til húsa í verslunarkjarnanum Norðurtorgi (gamla Sjafnarhúsinu) þar sem SportsDirect leigir 1.750 fermetra rými og líkt og í Kópavogi hefur fyrirtækið undirritað tíu ára leigusamning við fasteignafélagið Klettás.

James France, yfirmaður fasteignamála hjá Frasers Group, segir fyrirtækið stolt af því að auka fjárfestingu sína á Íslandi með opnun nýrrar verslunar auk framlengds leigusamnings og áforma um endurbætur á versluninni í Kópavogi.

„Það er mikilvægt fyrir vöxt verslanasafns okkar að færa út kvíarnar alþjóðlega og markmið okkar er að verða leiðandi söluaðili íþróttavöru bæði í Bretlandi og Evrópu,“ segir hann.

Ráðgjafafyrirtækið Croisette á Íslandi var ráðgjafi Frasers Group við leit að húsnæði og gerð leigusamninga.

„Við erum mjög ánægð með að alþjóðlegt stórfyrirtæki á borð við Fraser Group hafi leitað aðstoðar Croisette á Íslandi, fagleg ráðgjöf til bæði leigusala og leigutaka er mikilvægur þáttur í þróun íslenska fasteignamarkaðarins,“ segir Styrmir Bjartur Karlsson, framkvæmdastjóri Croisette á Íslandi.

Opnun SportsDirect á Akureyri er mikið fagnaðarefni að sögn Ragnar Sverrissonar, formanns Kaupmannafélags Akureyrar sem segist fagna allri samkeppni í verslunargeiranum.

„Það styrkir Akureyri sem verslunarstað að fá SportsDirect í bæinn. Við eigum ekki eingöngu í samkeppni við Reykjavík heldur við allan heiminn og það er mikilvægt að þessi verslun eigi sér stað hér í bænum“, segir Ragnar Sverrisson.