Ríflega tveggja ára starfsemi veitingastaðarins Spaðans er nú lokið en í tilkynningu frá Þórarni Ævarssyni, framkvæmdastjóra Spaðans, kemur fram að rekstur fyrirtækisins hafi af ýmsum ástæðum gengið erfiðlega undanfarið.

Þórarinn segir fyrirtækið hafa leitað allra leiða til að halda rekstrinum gangandi en að þær tilraunir hafi ekki borið tilætlaðan árangur.

Spaðinn rak tvo veitingastaði, einn á Dalvegi í Kópavogi og annan á Fjarðargötu í Hafnarfirði en því útibúi var lokað í maí síðastliðnum.

„Skuldir Spaðans eru nær einvörðungu við eigendur fyrirtækisins en þar sem rekstrargrundvöllur er brostinn er það mat eiganda að réttast sé að hætta starfsemi. Því var síðasti starfsdagur þess í gær, sunnudaginn 3. júlí,“ segir jafnframt í tilkynningunni.